തിരുവനന്തപുരം: കേരളം വീണ്ടും തെരഞ്ഞെടുപ്പ് ചൂടിലേക്ക്. വയനാട് ലോക്സഭാ മണ്ഡലത്തിലേക്കും പാലക്കാട്, ചേലക്കര നിയമസഭ മണ്ഡലങ്ങളിലേക്കുള്ള ഉപതെരഞ്ഞെടുപ്പ് നവംബര് 13ന് നടക്കും. മൂന്നിടത്തും നവംബര് 23നാണ് വോട്ടെണ്ണല്. കേരളത്തില് വെള്ളിയാഴ്ച മുതല് പത്രിക സമര്പ്പിക്കാം. പത്രിക സമര്പ്പിക്കാനുള്ള അവസാന തീയതി 25 ആണ്. സൂക്ഷ്മ പരിശോധന 28ന് നടക്കും. പത്രിക പിന്വലിക്കാനുള്ള അവസാന തീയതി 30 ആണ്. അതേസമയം പാലക്കാട് തെരഞ്ഞെടുപ്പ് തീയതി മാറ്റണമെന്ന് കോണ്ഗ്രസ് ആവശ്യപ്പെട്ടു. കല്പ്പാത്തി രഥോത്സവം നടക്കുന്ന സാഹചര്യത്തിലാണ് വോട്ടെടുപ്പ് മാറ്റണമെന്ന കോണ്ഗ്രസിന്റെ അഭ്യര്ഥന.
വയനാട് എംപിയായി തിരഞ്ഞെടുക്കപ്പെട്ട രാഹുല് ഗാന്ധി രാജി വെച്ചതിനാലാണ് വയനാട് ലോക്സഭാ മണ്ഡലത്തിലേക്ക് ഉപ തിരഞ്ഞെടുപ്പ് നടക്കുന്നത്. പാലക്കാട് എംഎല്എ ഷാഫി പറമ്പിലും ചേലക്കര എംഎല്എ കെ രാധാകൃഷ്ണനും ലോക്സഭയിലേക്ക് മത്സരിച്ച് വിജയിച്ചതോടെയാണ് ഇരു മണ്ഡലങ്ങളിലും ഉപതിരഞ്ഞെടുപ്പ് ആവശ്യമായത്.
