തിരുവനന്തപുരം: വാശിയേറിയ പ്രചരണ പരിപാടികള്ക്കൊടുവില് വയനാട് ലോക്സഭാ മണ്ഡലത്തിലെയും ചേലക്കര നിയമസഭാ മണ്ഡലത്തിലെയും തെരഞ്ഞെടുപ്പ് പരസ്യപ്രചാരണത്തിന് കൊട്ടിക്കലാശം. ഇന്ന് വൈകിട്ട് അഞ്ച് മണിക്കാണ് കൊട്ടിക്കലാശം. നാളെ നിശബ്ദ പ്രചാരണം. 13നാണ് വോട്ടെടുപ്പ് നടക്കുക. കല്പ്പാത്തി രഥോത്സവത്തെ തുടര്ന്ന് ഉപതെരഞ്ഞെടുപ്പ് പ്രമാണിച്ച് പാലക്കാട് 20നാണ് വോട്ടെടുപ്പ്.
മണ്ഡലങ്ങളില് വോട്ട് പിടിക്കാന് മൂന്ന് മുന്നണികളുടേയും മുഴുവന് നേതാക്കളും ഇന്ന് കളത്തില് ഇറങ്ങും. എല്ഡിഎഫും യുഡിഎഫും തമ്മില് ഇഞ്ചോടിച്ച് പോരാട്ടമാണ് നടക്കുന്നത്. ശക്തി തെളിയിക്കാന് എന്ഡിഎയും ഒപ്പത്തിനൊപ്പമുണ്ട്. ചേലക്കരയില് എല്ഡിഎഫിനായി യു ആര് പ്രദീപും യുഡിഎഫിനായി രമ്യ ഹരിദാസും എന്ഡിഎയ്ക്കായി കെ ബാലകൃഷ്ണനുമാണ് മത്സരരംഗത്തുള്ളത്. വയനാട്ടില് പ്രിയങ്ക ഗാന്ധിയാണ് യുഡിഎഫ് സ്ഥാനാര്ഥി. സിപിഐ നേതാവ് സത്യന് മൊകേരിയാണ് എല്ഡിഎഫിനായി മത്സരരംഗത്തുള്ളത്. നവ്യ ഹരിദാസ് ആണ് എന്ഡിഎ സ്ഥാനാര്ഥി. കൊട്ടിക്കലാശത്തിന് ആവേശം പകരാന് പ്രിയങ്കയ്ക്ക് ഒപ്പം ലോക്സഭ പ്രതിപക്ഷ നേതാവ് രാഹുല് ഗാന്ധിയും പങ്കെടുക്കും.
