പാലക്കാട്: പാലക്കാട്ടെ ഇടതു സ്ഥാനാര്ത്ഥി പി സരിന് വേണ്ടി വോട്ട് പിടിക്കാന് കളത്തിലിറങ്ങി സിപിഐഎം കേന്ദ്ര കമ്മിറ്റി അംഗം ഇ പി ജയരാജന്. സരിന് ഉത്തമനായ ചെറുപ്പക്കാരനാണെന്നും പൊതുസമൂഹത്തോട് പ്രതിജ്ഞാബദ്ധയുള്ള ചെറുപ്പക്കാരനാണെന്നും അദ്ദേഹം വാര്ത്താ സമ്മേളനത്തില് പറഞ്ഞു. ജനസേവനത്തിന് വേണ്ടി വലിയ ശമ്പളമുള്ള ജോലി രാജിവെച്ചയാളാണ് സരിനെന്നും ഇ പി കൂട്ടിച്ചേര്ത്തു. ഇന്ന് രാവിലെയാണ് ഇപി പാലക്കാട്ടേക്ക് പുറപ്പെട്ടത്.
കട്ടന്ചായയും പരിപ്പുവടയും ഒരു കമ്യൂണിസ്റ്റിന്റെ ജീവിതം എന്ന പേരില് ഇ പി ജയരാജന്റെ പുറത്തവരാനിരുന്ന ആത്മകഥയില് സരിനെതിരെയുള്ള പരാമര്ശവുമുണ്ടായിരുന്നു. സരിനെ സ്ഥാനാര്ഥിയാക്കിയ തീരുമാനം ശരിയോ തെറ്റോ എന്ന് കാലം തെളിയിക്കുമെന്ന് ആത്മകഥയുടേതെന്ന പേരില് പുറത്ത് വന്ന പിഡിഎഫില് പറയുന്നുണ്ട്.
എന്നാല് എഴുതി തീരാത്ത ആത്മകഥയെ കുറിച്ചാണ് വാര്ത്ത പരക്കുന്നതെന്ന് ഇപി വ്യക്തമാക്കിയിരുന്നു. സരിനെ പിന്തുണച്ച് കൊണ്ട് വാര്ത്താ സമ്മേളനം നടത്തുകയായിരുന്നു. സരിന് വിശ്വസിച്ച രാഷ്ട്രീയത്തില് സത്യസന്ധതയും നീതിയും ലഭിക്കുന്നില്ലെന്ന് ബോധ്യമായപ്പോള് ഇടതുപക്ഷത്തോടൊപ്പം ചേരുകയായിരുന്നുവെന്ന് ഇ പി പറഞ്ഞു. ഏറ്റവും യോഗ്യനായ ആളാണ് പാലക്കാട് മത്സരിക്കുന്നതെന്നും സരിനെ പുകഴ്ത്തി ഇ പി ജയരാജന് പറഞ്ഞു.
