ആലപ്പുഴ: ആലപ്പുഴയില് സിപിഐഎം യുവ നേതാവ് അഡ്വ. ബിപിന് സി ബാബു ബിജെപിയിലേക്ക്. സിപിഎം കായംകുളം ഏരിയാ കമ്മിറ്റി അംഗവും ജില്ലാ പഞ്ചായത്തംഗവുമായ ബിപിന് ആണ് ബിജെപിയിലേക്ക് ചേര്ന്നത്. തിരുവനന്തപുരത്ത് സംസ്ഥാന അധ്യക്ഷന് കെ സുരേന്ദ്രന് ഉള്പ്പെടെയുള്ള നേതാക്കളുടെ സാന്നിധ്യത്തിലാണ് ബിപിന് ബിജെപി അംഗത്വമെടുത്തത്. ബിജെപി അഖിലേന്ത്യാ ജനറല് സെക്രട്ടറി തരുണ് ചുഗ് ആണ് ബിബിന് അംഗ്വതം നല്കി സ്വീകരിച്ചത്. ആലപ്പുഴ ജില്ലയില് സിപിഎമ്മിലെ വിഭാഗീയത രൂക്ഷമാകുന്നതിനിടെയാണ് ബിപിന് പാര്ട്ടി വിടുന്നത്.
എസ്എഫ്ഐ മുന് ജില്ലാ സെക്രട്ടറിയും ഡിവൈഎഫ്ഐ സംസ്ഥാന സമിതി അംഗവുമാണ് ബിബിന്. കേരള സര്വ്വകലാശാല സെനറ്റ് അംഗം കൂടിയാണ്. കൂടുതല് സിപിഐഎം നേതാക്കള് ബിജെപിയിലേക്ക് വരുമെന്ന് ബിബിന് സി ബാബുവിനെ സ്വീകരിക്കുന്ന പരിപാടിയില് സുരേന്ദ്രന് പറഞ്ഞു. കൊച്ചിയിലെ നേതൃയോഗത്തില് നിന്നും വിട്ടു നിന്ന പി കെ കൃഷ്ണദാസ്, എം ടി രമേശ് എന്നിവരും ഇന്ന് വേദിയിലേക്ക് എത്തി. ശോഭാ സുരേന്ദ്രനും പരിപാടിയില് പങ്കെടുത്തു.
സിപിഎം വര്ഗീയ ശക്തികളുടെ നിയന്ത്രണത്തിലാണെന്ന് പാര്ട്ടി വിട്ട് ബിജെപിയില് ചേര്ന്ന ഏരിയാ കമ്മിറ്റി അംഗം ബിപിന് സി.ബാബു പറഞ്ഞു. ”പാര്ട്ടി ഒരു വിഭാഗത്തിന്റെ മാത്രമായി മാറിക്കൊണ്ടിരിക്കുകയാണ്. വര്ഗീയ ശക്തികളാണ് ഇപ്പോള് പാര്ട്ടിയെ നിയന്ത്രിക്കുന്നത്. മതനിരപേക്ഷത ഇല്ലാത്ത പാര്ട്ടിയായി സിപിഎം മാറി. ലോക്സഭാ തിരഞ്ഞെടുപ്പില് ആലപ്പുഴയില് സിപിഎം നേരിട്ട ദയനീയ പരാജയം എല്ലാവരും കണ്ടതാണ്. ജി.സുധാകരന് പോലും ഇപ്പോള് ദയനീയമായ അവസ്ഥയാണ് ആലപ്പുഴയിലെന്നും ബിപിന് പറഞ്ഞു. ഒരു വിഭാഗത്തിന്റെ കൈയിലാണ് പാര്ട്ടി. ഇനി പാര്ട്ടിക്കു ഇങ്ങനെ മുന്നോട്ടുപോകാന് കഴിയില്ല. ആലപ്പുഴയില് ആയിരക്കണക്കിനു പേര് പാര്ട്ടി വിട്ടു പോകുന്ന ഘട്ടത്തിലാണ്. ഈ സമ്മേളന കാലം കഴിയുമ്പോള് എല്ലാവര്ക്കും അതു ബോധ്യപ്പെടുമെന്നും ബിപിന് കൂട്ടിച്ചേര്ത്തു.
നേരത്തെ, പാര്ട്ടിയില് അച്ചടക്ക നടപടി നേരിട്ടയാളാണ് ബിപിന് സി ബാബു. 2023ല് ഭാര്യയുടെ പരാതിയെ തുടര്ന്ന് ആറ് മാസത്തേക്കു സസ്പെന്ഷനിലായ ബിപിനെ പിന്നീട് പാര്ട്ടി ബ്രാഞ്ചിലേക്ക് തിരിച്ചെടുത്തിരുന്നു. ആലപ്പുഴ ജില്ലാ പഞ്ചായത്ത് കൃഷ്ണപുരം ഡിവിഷന് അംഗം, 2021- 23 ജില്ലാ പഞ്ചായത്ത് വൈസ് പ്രസിഡന്റ്, മുതുകുളം ബ്ലോക്ക് പഞ്ചായത്തിന്റ മുന് പ്രസിഡന്റ്, എസ്എഫ്ഐ ആലപ്പുഴ ജില്ലാ സെക്രട്ടറി, പ്രസിഡന്റ്, സ്റ്റേറ്റ് കമ്മിറ്റി മെമ്പര്, ഡിവൈഎഫ്ഐ ജില്ലാ പ്രസിഡന്റ്, സംസ്ഥാന കമ്മിറ്റി അംഗം, കേരള യൂണിവേഴ്സിറ്റി സെനറ്റ് അംഗം എന്നീ പദവികള് ബിപിന് വഹിച്ചിട്ടുണ്ട്.
