കൊച്ചി: വ്യവസായി ബോബി ചെമ്മണ്ണൂരിനെതിരെ നടി ഹണിറോസ് നല്കിയ പരാതിയില് രജിസ്റ്റര് ചെയ്ത കേസ് പ്രത്യേക അന്വേഷണസംഘം അന്വേഷിക്കും. സെന്ട്രല് എസിപി ജയകുമാറിന്റെ നേതൃത്വത്തില് മൂന്ന് വനിതാ ഉദ്യോഗസ്ഥരടങ്ങുന്ന 10 പേരുടെ അന്വേഷണസംഘം രൂപീകരിച്ചു. ബോബി ചെമ്മണ്ണൂര് ഹാജരായില്ലെങ്കില് അറസ്റ്റിലേക്ക് കടക്കാനും സാധ്യതയുണ്ട്.
പൊതുവേദിയില് പല തവണയായി സ്ത്രീത്വത്തെ അപമാനിച്ച് പരാമര്ശങ്ങള് നടത്തിയെന്നാണ് നടിയുടെ പരാതി. പൊതു വേദികളില് മനഃപൂര്വം പിന്തുടര്ന്ന് ദ്വയാര്ത്ഥ പ്രയോഗങ്ങളിലൂടെ ഒരു വ്യക്തി അപമാനിക്കാന് ശ്രമിക്കുന്നുവെന്നാണ് ഹണി റോസ് പരാതിയില് വ്യക്തമാക്കിയത്. എറണാകുളം സെന്ട്രല് പൊലീസ് സ്റ്റേഷനിലാണ് ബോബി ചെമ്മണ്ണൂരിനെതിരെ ഹണി റോസ് പരാതി നല്കിയത്. ഇക്കാര്യം ചൂണ്ടിക്കാട്ടി ഹണി റോസ് ഫേസ്ബുക്കില് കുറിപ്പും പങ്കുവെച്ചിരുന്നു. ഐടി ആക്ടും ബോബി ചെമ്മണ്ണൂരിനെതിരെ ചുമത്തിയിട്ടുണ്ട്.
