തിരുവനന്തപുരം: കേരളത്തിന്റെ വിനോദസഞ്ചാര മേഖലയിലേക്ക് ചരിത്രത്തിന്റെ സ്വർണ്ണഅക്ഷരങ്ങളിൽ എഴുതപ്പെടുന്ന നേട്ടം. 2025-ൽ സംസ്ഥാനത്തെത്തിയ സഞ്ചാരികളുടെ എണ്ണം സർവ്വകാല റെക്കോർഡുകൾ ഭേദിച്ചു. കേരള ടൂറിസം പുറത്തുവിട്ട കണക്കുകൾ പ്രകാരം കഴിഞ്ഞ വർഷം ആകെ 2,58,80,365 പേർ കേരളം സന്ദർശിച്ചു. 2024-ലെ 2,29,85,363 എന്ന കണക്കിനെ അപേക്ഷിച്ച് 28,95,002 പേരുടെ വർധനവാണ് രേഖപ്പെടുത്തിയിരിക്കുന്നത്.
ആഭ്യന്തര സഞ്ചാരികളുടെ എണ്ണത്തിൽ 12.64 ശതമാനം വർധനവ് രേഖപ്പെടുത്തി. കോവിഡ് കാലത്തിന് മുൻപുള്ള കണക്കുകളുമായി താരതമ്യം ചെയ്യുമ്പോൾ ഇത് 36.3 ശതമാനം അധികമാണ്. വിദേശ സഞ്ചാരികളുടെ വരവിലും ശ്രദ്ധേയമായ മുന്നേറ്റം ഉണ്ടായി. 2025-ൽ 8,21,999 വിദേശികൾ കേരളം സന്ദർശിച്ചു — കഴിഞ്ഞ വർഷത്തേക്കാൾ 11.33 ശതമാനം വർധന.
ഈ നേട്ടത്തിന് പിന്നിൽ സർക്കാരിന്റെ ക്രിയാത്മക ഇടപെടലുകളും ശക്തമായ വിപണന തന്ത്രങ്ങളുമാണെന്ന് ടൂറിസം മന്ത്രിപിഎ മുഹമ്മദ് റിയാസ് വ്യക്തമാക്കി. സാമൂഹ്യമാധ്യമ പോസ്റ്റിലൂടെ എല്ലാവർക്കും നന്ദി അറിയിച്ച അദ്ദേഹം, പല പ്രതിസന്ധികളെയും മറികടന്ന് കേരള ടൂറിസം കരുത്താർജ്ജിക്കുന്നതിന്റെ തെളിവാണ് ഈ നേട്ടമെന്നും പറഞ്ഞു.
ഉത്തരവാദിത്ത ടൂറിസം പദ്ധതികൾക്കും കാരവൻ ടൂറിസം പോലുള്ള നവീന പരീക്ഷണങ്ങൾക്കും ലഭിച്ച ജനപ്രീതി ഈ വളർച്ചയിൽ നിർണ്ണായക പങ്കുവഹിച്ചു. പ്രകൃതിസൗന്ദര്യം, സാംസ്കാരിക വൈവിധ്യം, സുരക്ഷിത അന്തരീക്ഷം എന്നിവയുടെ കൂട്ടായ്മയോടെ കേരളം ലോക സഞ്ചാരികളുടെ പ്രിയഗമ്യസ്ഥാനമായി വീണ്ടും ഉയർന്ന് നിൽക്കുകയാണ്.
