തിരുവനന്തപുരം: വ്യാജ തിരിച്ചറിയല് കാര്ഡ് നിര്മ്മിച്ചത് എ ഗ്രൂപ്പ് സ്ഥാനാര്ത്ഥികളെ വിജയിപ്പിക്കാനാണെന്ന് റിമാന്ഡ് റിപ്പോര്ട്ട്. യൂത്ത് കോണ്ഗ്രസ് സംഘടനാ തിരഞ്ഞെടുപ്പിനായി നിര്മ്മിച്ച വ്യാജ ഐഡി കാര്ഡുകള് നിര്മ്മിച്ചത് യൂത്ത് കോണ്ഗ്രസ് പ്രവര്ത്തകര് തന്നെയാണെന്നും പൊലീസ് റിമാന്ഡ് റിപ്പോര്ട്ടില് വ്യക്തമാക്കിയിട്ടുണ്ട്.
കേസിലെ ഒന്നും രണ്ടും പ്രതികളെ പിടികൂടിയത് രാഹുല് മാങ്കൂട്ടത്തിലിന്റെ ഉടമസ്ഥതയിലുള്ള കാറില് നിന്നുമാണ്. പ്രതികള് കാറില് സഞ്ചരിക്കവെ പൊലീസ് കൈ കാണിച്ചെങ്കിലും വാഹനം നിര്ത്തിയില്ല. പിന്നീട് മേട്ടുകടയില് വച്ചാണ് പ്രതികളെ പിടികൂടിയതെന്നും പൊലീസ് റിമാന്ഡ് റിപ്പോര്ട്ടില് പറയുന്നു. ഫെനി നൈനാന്, ബിനില് ബിനു എന്നിവരാണ് ഒന്നും രണ്ടും പ്രതികള്. സംഭവത്തില് കൂടുതല് പേര്ക്ക് പങ്കുണ്ടോയെന്ന് പോലീസ് അന്വേഷിച്ചു വരികയാണ്.
