കൊച്ചി കുസാറ്റ് ക്യാമ്പസില് ടെക്ഫെസ്റ്റിനിടെയുണ്ടായ അപകടത്തില് ഉന്നത വിദ്യാഭ്യാസ വകുപ്പ് അന്വേഷണം പ്രഖ്യാപിച്ചു. വിസിയോടും ഉന്നത വിദ്യാഭ്യാസ പ്രിന്സിപ്പല് സെക്രട്ടറിയോടും ഉന്നത വിദ്യാഭ്യാസ മന്ത്രി ആര് ബിന്ദു റിപ്പോര്ട്ട് തേടി. മരിച്ച വിദ്യാര്ത്ഥികളുടെ പോസ്റ്റ്മോര്ട്ടം ഇന്ന് രാവിലെ ഏഴോടെ ആരംഭിച്ചു.
പരിക്കേറ്റ വിദ്യാര്ത്ഥികളുടെ അടക്കം മൊഴികള് ഇന്ന് രേഖപ്പെടുത്തും. ഇന്നലെ വൈകിട്ടാണ് സര്വ്വകലാശാല കാന്പസില് ടെക് ഫെസ്റ്റിന്റെ ഭാഗമായ സംഗീത നിശക്ക് തൊട്ടുമുമ്പുണ്ടായ തിക്കിലും തിരക്കിലും മൂന്ന് വിദ്യാര്ത്ഥികളടക്കം നാല് പേര് മരിച്ചത്. അപകടത്തില് 51 പേര്ക്ക് പരിക്കേറ്റു. ഇവരില് ഒരാളുടെ നില അതീവ ഗുരുതരമാണ്.
ടെക്ഫെസ്റ്റിന്െ ഭാഗമായി കാമ്പസിനകത്തുള്ള ആംഫി തീയ്യേറ്ററില് സംഘടിപ്പിച്ച സംഗീത നിശയില് പങ്കെടുക്കാനെത്തിയവരാണ് അപടകത്തില് പെട്ടത്. വിദ്യാര്ത്ഥികളുടെ തിരക്കായിരുന്നു ആംഫീ തീയറ്ററില്. മഴ പെയ്തപ്പോള് റോഡരികില് നിന്നവര് തള്ളിക്കയറാന് ശ്രമിച്ചതാണ് അപകടകാരണം. തീയറ്ററിലേക്ക് കയറാനും ഇറങ്ങാനും ഒരു ഗേറ്റ് മാത്രമാണുള്ളത്. ഗേറ്റ് കഴിഞ്ഞുള്ള പടിക്കെട്ടില് നിന്നവര് തിക്കിലും തിരക്കിലും താഴോട്ട് വീഴുകയായിരുന്നു. വീണ ആളുകളുടെ മുകളിലേക്ക് വീണ്ടും ആളുകള് വീണു. എണീക്കാന് കഴിയാത്ത രീതിയിലായിരുന്നു വിദ്യാര്ത്ഥികള്. ചവിട്ടേറ്റും ശ്വാസം മുട്ടിയുമാണ് വിദ്യാര്ത്ഥികള് മരിച്ചത്. രണ്ടാം വര്ഷ സിവില് എഞ്ചിനിയറിംഗ് വിദ്യാര്ത്ഥികളായ കൂത്താട്ടുകുളം സ്വദേശി അതുല് തമ്പി, നോര്ത്ത് പറവൂര് സ്വദേശിനി ആന് റൂഫ് , താമരശ്ശേരി സ്വദേശിനി സാറ തോമസ്, കുസാറ്റിലെ വിദ്യാര്ത്ഥിയല്ലാത്ത പാലക്കാട് മുണ്ടൂര് സ്വദേശി ആല്ബിന് ജോസഫ് എന്നിവരാണ് മരിച്ചത്.
