തിരുവനന്തപുരം: മാലിന്യ സംസ്കരണ ചട്ടങ്ങള് ലംഘിച്ചാല് ഇനി എട്ടിന്റെ പണികിട്ടും. മാലിന്യ രഹിത കേരളം കാമ്പയിന്റെ ഭാഗമായി പരിഷ്കരിച്ച നിയമങ്ങള് പ്രകാരം മാലിന്യ സംസ്കരണ ചട്ടങ്ങള് ലംഘിച്ചാല് പരമാവധി 50,000 രൂപ പിഴയും ഒരു വര്ഷം വരെ തടവും ലഭിക്കും. ശിക്ഷാനടപടികള് നടപ്പിലാക്കാന് സെക്രട്ടറിക്ക് അധികാരം നല്കിയിട്ടുണ്ടെന്നും നോട്ടീസ് നല്കി നിയമലംഘകരുടെ വാദം കേട്ട ശേഷം പിഴ ചുമത്താമെന്നും തദ്ദേശ സ്വയംഭരണ വകുപ്പ് പുറത്തിറക്കിയ പ്രസ്താവനയില് പറഞ്ഞു.
കഴിഞ്ഞയാഴ്ച പുറത്തിറക്കിയ കേരള പഞ്ചായത്ത് രാജ് (ഭേദഗതി) ഓര്ഡിനന്സ്, 2023, കേരള മുനിസിപ്പാലിറ്റി (ഭേദഗതി) ഓര്ഡിനന്സ്, 2023 എന്നിവ പ്രകാരം, നിയമലംഘകര് പിഴയടച്ചില്ലെങ്കില് പിഴ ഈടാക്കുമെന്ന് തദ്ദേശ സ്വയംഭരണ മന്ത്രി എം ബി രാജേഷ് അറിയിച്ചു. കൂടാതെ, മാലിന്യ സംസ്കരണത്തിന് ആവശ്യമായ നടപടികള് സ്വീകരിക്കുന്നതിന് തദ്ദേശ സ്വയംഭരണ സ്ഥാപനങ്ങളിലെ ഉദ്യോഗസ്ഥര്ക്ക് ചുമതല നല്കാനും സെക്രട്ടറിക്ക് അധികാരമുണ്ട്.
