ദില്ലി: ചൈനയിലെ കണ്ടെത്തിയ പുതിയ വൈറസ് വ്യാപനത്തില് മുന്കരുതല് നടപടികള് സ്വീകരിച്ച് കേന്ദ്ര സര്ക്കാര്. വൈറസ് വ്യാപനത്തില് ഇന്ത്യയില് യാതൊരു വിധ ആശങ്കയും വേണ്ടെന്ന് കേന്ദ്ര സര്ക്കാര് അറിയിച്ചു. മുന്കരുതല് നടപടികളുടെ ഭാഗമായി ആശുപത്രി കിടക്കകളും വെന്റിലേറ്ററുകളും സജ്ജമാക്കാനുള്ള നിര്ദേശം നല്കിയിട്ടുണ്ടെന്നും കേന്ദ്രം അറിയിച്ചു. ചൈനയിലെ വൈറസ് വ്യാപനത്തില് നേരത്തെ തന്നെ കേന്ദ്രം നിരീക്ഷണം ശക്തമാക്കിയിരുന്നു.
കൂടാതെ, പിപിഇ കിറ്റുകളും പരിശോധന കിറ്റുകളും ശേഖരിച്ച് വെയ്ക്കാനും നിര്ദേശം നല്കിയിട്ടുണ്ട്. ചൈനയിലെ ശ്വാസകോശ രോഗം വ്യാപകമായി പടരുന്നതാണെന്ന തെളിവൊന്നുമില്ലെന്നും കേന്ദ്രം വ്യക്തമാക്കി. നിലവില് ഇന്ത്യയില് ആശങ്കപ്പെടേണ്ട സാഹചര്യമില്ലെന്നാണ് കേന്ദ്ര ആരോഗ്യമന്ത്രാലയം വ്യക്തമാക്കിയത്. വൈറസ് പടരുന്ന സാഹചര്യം സൂക്ഷ്മായി നിരീക്ഷിക്കുന്നുവെന്നും ഏത് സാഹചര്യത്തെയും നേരിടാന് രാജ്യം സജ്ജമാണെന്നും ആരോഗ്യ മന്ത്രാലയം വ്യക്തമാക്കി.
