കൊച്ചി: ലൈംഗികാതിക്രമ കേസില് സംവിധായകന് രഞ്ജിത്തിനെതിരെ ചുമത്തിയത് ജാമ്യം ലഭിക്കാവുന്ന കുറ്റമാണ്. ഐപിസി 354ാം വകുപ്പ് പ്രകാരമാണ് കേസെടുത്തത്. എറണാകുളം നോര്ത്ത് പൊലീസാണ് രഞ്ജിത്തിനെതിരെ കേസെടുത്തത്. 2009ലാണ് കുറ്റകൃത്യം സംഭവിച്ചത്. അന്ന് ജാമ്യം ലഭിക്കാവുന്ന കുറ്റമായിരുന്നു ഇത്. പരാതിയില് രഞ്ജിത്തിനെ ഇന്ന് ചോദ്യം ചെയ്യും.
നടിയുടെ മൊഴിയും ഇന്ന് രേഖപ്പെടുത്തും. പ്രത്യേക അന്വേഷണ സംഘത്തിന്റെ നിര്ണായക യോഗവും ഇന്ന് ചേരും. തുടര്നടപടികള് പ്രത്യേക അന്വേഷണ സംഘത്തിന്റെ നിര്ദേശപ്രകാരമായിരിക്കും. രഞ്ജിത്തിനെതിരെ ക്രിമിനല് നടപടിയെടുക്കണമെന്നാവശ്യപ്പെട്ട് ഇ-മെയില് വഴിയാണ് നടി പരാതി നല്കിയത്. കൊച്ചി സിറ്റി പൊലീസ് കമ്മീഷണര്ക്കാണ് നടി പരാതി നല്കിയത്.
പാലേരി മാണിക്യം സിനിമയുടെ ഷൂട്ടുമായി ബന്ധപ്പെട്ട് നടിയെ ഫ്ലാറ്റിലേക്ക് വിളിച്ചത് രഞ്ജിത്ത് ആണെന്നാണ് നടി പരാതിയില് പറയുന്നത്. ലൈംഗിക ഉദ്ദേശത്തോടെ ശരീരത്തില് സ്പര്ശിച്ചുവെന്നും സിനിമയല്ല ഉദ്ദേശം എന്ന് മനസിലായതോടെ ഹോട്ടല് മുറിയിലേക്ക് മടങ്ങിയെന്നുമാണ് നടി വെളിപ്പെടുത്തിയത്. സംഭവത്തെ കുറിച്ച് സൃഹൃത്തായ സംവിധായകന് ജോഷി ജോസഫിനെ അറിയിച്ചിരുന്നുവെന്നും നടിയുടെ പരാതിയില് പറയുന്നു.
