സൂപ്പര്താരങ്ങളായ മമ്മൂട്ടിയും നയന്താരയും അവസാനമായി ഒന്നിച്ചത് മലയാളം ചിത്രമായ ‘പുതിയ നിയമം’ എന്ന സിനിമയിലാണ്. ഇപ്പോള് ഇരുവരും ബിഗ് സ്ക്രീനില് വീണ്ടും ഒരുമിക്കാന് പോകുന്നുവെന്ന് റിപ്പോര്ട്ട്. ഗൗതം വാസുദേവ് മേനോനാണ് സിനിമ സംവിധാനം ചെയ്യുന്നത്. എന്നാല്, ഇതേ കുറിച്ച് ഔദ്യോഗിക സ്ഥിരീകരണം ഉണ്ടായിട്ടില്ല. പ്രമുഖ ട്രേഡ് അനലിസ്റ്റ് ആയ ശ്രീധര് പിള്ളയാണ് എക്സ് പ്ലാറ്റ്ഫോമിലൂടെ ഇക്കാര്യം അറിയിച്ചത്. മമ്മൂട്ടി കമ്പനിയുടെ ബാനറില് മമ്മൂട്ടി തന്നെ ചിത്രം നിര്മ്മിക്കുമെന്നും അദ്ദേഹം റിപ്പോര്ട്ട് ചെയ്യുന്നു. എട്ട് വര്ഷത്തിന് ശേഷം മമ്മൂട്ടിയും നയന്താരയും ഒന്നിക്കുന്ന ചിത്രമായിരിക്കും ഇത്.
വാരണം ആയിരം, വേട്ടയാട് വിളയാട് തുടങ്ങിയ ചിത്രങ്ങളിലൂടെ പ്രശസ്തനായ കോളിവുഡ് സംവിധായകന് ഗൗതം വാസുദേവ് മേനോന് തന്റെ ആദ്യ മലയാളം ചിത്രം ഉടന് സംവിധാനം ചെയ്യുമെന്ന് ഊഹാപോഹങ്ങള് ശക്തമാണ്. നന്പകല് നേരത്ത് മയക്കം, കാതല് – ദി കോര്, കണ്ണൂര് സ്ക്വാഡ് തുടങ്ങിയ സിനിമകള് നിര്മ്മിച്ച മമ്മൂട്ടി കമ്പനിയുടെ പ്രൊഡക്ഷന് ഹൗസ് മമ്മൂട്ടിയുടെ ഉടമസ്ഥതയിലാണ്. 2016ല് എ കെ സാജന് സംവിധാനം ചെയ്ത പുതിയ നിയമം എന്ന ക്രൈം ത്രില്ലറിലാണ് മമ്മൂട്ടിയും നയന്താരയും അവസാനമായി ഒന്നിച്ചത്. മോളിവുഡില് അരങ്ങേറ്റം കുറിച്ച നയന്താരയും മമ്മൂട്ടിയും 2005ല് പുറത്തിറങ്ങിയ രാപ്പകല് എന്ന കുടുംബചിത്രത്തിലും ഒരുമിച്ച് അഭിനയിച്ചിട്ടുണ്ട്. ദുല്ഖര് സല്മാന് നായകനായി അഭിനയിച്ച എബിസിഡി എന്ന സിനിമ തിരക്കഥയ്ക്ക് പിന്നിലുള്ളവരാണ് ചിത്രത്തിന് തിരക്കഥയൊരുക്കുന്നതെന്ന് റിപ്പോര്ട്ടുകളുണ്ട്.
