കോടി രൂപയുടെ ‘വ്യാജ’ ഭാഗ്യദാര ടിക്കറ്റ്; കേരള ലോട്ടറിയുടെ വിശ്വാസം തകരുമ്പോൾ സർക്കാർ മറുപടി പറയണം
പ്രത്യേക ലേഖകൻ
കേരള ലോട്ടറിയുടെ ചരിത്രത്തിൽ തന്നെ ഏറ്റവും ഗൗരവമായി പരിശോധിക്കപ്പെടേണ്ട സംഭവങ്ങളിലൊന്നാണ് ഭാഗ്യദാര ലോട്ടറിയുടെ ഒന്നാം സമ്മാനവുമായി ബന്ധപ്പെട്ട് പുറത്തുവന്ന വിവാദം. ആലപ്പുഴ ജില്ലയിലെ ചേർത്തല സ്വദേശിയുടെ കൈവശമുണ്ടായിരുന്ന ടിക്കറ്റിൽ സർക്കാർ ഔദ്യോഗിക ആപ്പിലെ ക്യൂആർ കോഡ് പരിശോധിച്ചപ്പോൾ ഒന്നാം സമ്മാനം ലഭിച്ചതായി വ്യക്തമായിട്ടും, സമ്മാനത്തുക കൈപ്പറ്റാൻ ലോട്ടറി ഓഫീസിലെത്തിയപ്പോൾ അത് “വ്യാജ ടിക്കറ്റാണ്” എന്നായിരുന്നു മറുപടി. ഒരു മനുഷ്യന്റെ സ്വപ്നങ്ങൾ തകർത്ത സംഭവം എന്നതിലുപരി, കേരള ലോട്ടറി സംവിധാനത്തിന്റെ വിശ്വാസ്യതയെ നടുക്കുന്ന സംഭവമായാണ് ഇതിനെ കാണേണ്ടത്.
ഇവിടെ ഏറ്റവും വലിയ ദുരൂഹത ക്യൂആർ കോഡാണ്. സർക്കാർ തന്നെ വികസിപ്പിച്ച ഔദ്യോഗിക സംവിധാനത്തിൽ ഒരു ടിക്കറ്റ് ഒന്നാം സമ്മാനാർഹമാണെന്ന് തെളിയിക്കുന്ന ക്യൂആർ കോഡ് പിന്നീട് എങ്ങനെ വ്യാജ ടിക്കറ്റിൽ പ്രത്യക്ഷപ്പെട്ടു? ഒരു വ്യാജ ടിക്കറ്റിന് സർക്കാർ ആപ്പ് എങ്ങനെ ഒന്നാം സമ്മാനം കാണിച്ചു? ഇതൊരു സാധാരണ സാങ്കേതിക പിഴവായി തള്ളിക്കളയാനാകുമോ? അതോ സുരക്ഷാ സംവിധാനത്തിൽ ഗുരുതരമായ വീഴ്ചയാണോ? ഈ ചോദ്യങ്ങൾക്ക് സർക്കാർ ഇതുവരെ വ്യക്തമായ മറുപടി നൽകിയിട്ടില്ല.
അതിലും വലിയ ചോദ്യം മറ്റൊന്നാണ്. ഈ ടിക്കറ്റ് വ്യാജമാണെങ്കിൽ യഥാർഥ ഒന്നാം സമ്മാന ടിക്കറ്റ് എവിടെയാണ്? ആ സമ്മാനത്തുക ആർക്കാണ് ലഭിച്ചത്? സർക്കാർ അത് സംബന്ധിച്ച വിവരങ്ങൾ എന്തുകൊണ്ട് പരസ്യമാക്കുന്നില്ല? സംശയങ്ങൾ ഉയരുമ്പോൾ മൗനം പാലിക്കുന്നത് പൊതുജനങ്ങളുടെ വിശ്വാസം നഷ്ടപ്പെടുത്തുക മാത്രമാണ് ചെയ്യുന്നത്.
ഈ നറുക്കെടുപ്പ് നടന്നത് പിണറായി വിജയൻ സർക്കാരിന്റെ അവസാനഘട്ടത്തിലാണ്. അന്ന് ലോട്ടറി വകുപ്പ് ധനവകുപ്പിന്റെ കീഴിലായിരുന്നു. അതിനാൽ അന്നത്തെ മുഖ്യമന്ത്രി പിണറായി വിജയനും ധനമന്ത്രി കെ. എൻ. ബാലഗോപാലും ഈ സംഭവത്തിൽ ഉയർന്നിരിക്കുന്ന ചോദ്യങ്ങളിൽ നിന്ന് ഒഴിഞ്ഞുമാറാനാവില്ല. ജനങ്ങളുടെ പണംകൊണ്ട് പ്രവർത്തിക്കുന്ന ഒരു പൊതുസംവിധാനത്തിൽ ഇത്തരമൊരു സംഭവം ഉണ്ടായാൽ അതിന്റെ വിശദീകരണം നൽകേണ്ടത് ഭരണകൂടത്തിന്റെ ഉത്തരവാദിത്തമാണ്.
ഈ സംഭവം മറ്റൊരു ഗുരുതരമായ പോരായ്മയും തുറന്നുകാട്ടുന്നു. കഴിഞ്ഞ കുറച്ച് വർഷങ്ങളായി കേരള ലോട്ടറി ടിക്കറ്റുകളിൽ ഏജന്റുമാരുടെ സീൽ ഒഴിവാക്കിയിരിക്കുകയാണ്. ഇത് പുനഃപരിശോധിക്കേണ്ട സമയമായിരിക്കുന്നു. ഒരു ടിക്കറ്റ് ഏത് ഏജന്റിലൂടെ വിറ്റതാണെന്ന് പോലും തിരിച്ചറിയാൻ കഴിയാത്ത സാഹചര്യം നിലനിൽക്കുമ്പോൾ, വ്യാജ ടിക്കറ്റുകളെക്കുറിച്ചുള്ള അന്വേഷണവും ഉത്തരവാദിത്ത നിർണയവും കൂടുതൽ ദുഷ്കരമാകുന്നു.
അതുകൊണ്ട് ഏജന്റിന്റെ സീലില്ലാത്ത ഒരു ലോട്ടറി ടിക്കറ്റും കേരളത്തിൽ വിൽക്കാൻ അനുവദിക്കരുത്. ഓരോ ടിക്കറ്റിലും അംഗീകൃത ഏജൻസിയുടെ സീൽ, തിരിച്ചറിയൽ നമ്പർ, ഡിജിറ്റൽ ട്രാക്കിംഗ് സംവിധാനം എന്നിവ നിർബന്ധമാക്കണം. ക്യൂആർ കോഡ് സുരക്ഷാ സംവിധാനം സ്വതന്ത്ര വിദഗ്ധരെ ഉൾപ്പെടുത്തി പരിശോധിക്കുകയും ആവശ്യമായ സാങ്കേതിക പരിഷ്കാരങ്ങൾ നടപ്പാക്കുകയും വേണം.
കേരള ലോട്ടറി വെറും ഭാഗ്യക്കച്ചവടമല്ല. ആയിരക്കണക്കിന് ടിക്കറ്റ് വിൽപ്പനക്കാരുടെയും ഏജന്റുമാരുടെയും ഉപജീവനമാണ്. നൂറുകണക്കിന് വയോധികരും ഭിന്നശേഷിക്കാരും സ്ത്രീകളും ഒരു ദിവസത്തെ അന്നത്തിനായി തെരുവിൽ ടിക്കറ്റ് വിൽക്കുകയാണ്. അതുപോലെ, ഒരു ദിവസത്തെ കൂലിയിൽ നിന്ന് മിച്ചംപിടിച്ച പണംകൊണ്ട് ലക്ഷക്കണക്കിന് സാധാരണക്കാർ പ്രതീക്ഷയോടെ ടിക്കറ്റ് വാങ്ങുന്നു. അവരുടെ വിശ്വാസമാണ് കേരള ലോട്ടറിയുടെ യഥാർഥ മൂലധനം.
ഓണം ബമ്പർ ഉൾപ്പെടെ കോടിക്കണക്കിന് രൂപയുടെ സമ്മാനങ്ങളുള്ള ലോട്ടറികൾ വീണ്ടും വിപണിയിലെത്താനിരിക്കെ ഈ വിവാദം അവഗണിക്കാനാവില്ല. പുതിയ സർക്കാർ അടിയന്തരമായി ഇടപെട്ട് സുതാര്യമായ അന്വേഷണം പ്രഖ്യാപിക്കണം. സംഭവത്തിലെ എല്ലാ വസ്തുതകളും പൊതുജനങ്ങൾക്ക് മുന്നിൽ കൊണ്ടുവരണം. അതോടൊപ്പം, ഏജന്റിന്റെ സീൽ നിർബന്ധമാക്കുന്ന സംവിധാനം പുനഃസ്ഥാപിക്കുകയും, സുരക്ഷാ മാനദണ്ഡങ്ങൾ ശക്തമാക്കുകയും വേണം.
ജനങ്ങളുടെ വിശ്വാസം നഷ്ടപ്പെട്ടാൽ കേരള ലോട്ടറി സംവിധാനത്തിന് നിലനിൽപ്പില്ല. ആ വിശ്വാസം സംരക്ഷിക്കുകയാണ് ഇനി സർക്കാരിന്റെ ഏറ്റവും വലിയ ഉത്തരവാദിത്തം.
