തിരുവനന്തപുരം: സംസ്ഥാനത്ത് താപനില ഉയരുന്ന സാഹചര്യത്തില് മുന്നറിയിപ്പുമായി ആരോഗ്യവകുപ്പ്. വരും ദിവസങ്ങളിലും താപനില ഉയരാന് സാധ്യത ഉള്ളതിനാല് തൊഴില് സമയം ഉള്പ്പെടെ ക്രമീകരിച്ച് ചൂടിനെ പ്രതിരോധിക്കാനാണ് നിര്ദ്ദേശം.
വരും ദിവസങ്ങളില് മൂന്ന് ജില്ലയില് ഉയര്ന്ന താപനില മുന്നറിയിപ്പുണ്ട്. കോഴിക്കോട്, കണ്ണൂര്, തിരുവനന്തപുരം ജില്ലകളിലാണ് മുന്നറിയിപ്പ്. ഈ ജില്ലകളില് സാധാരണയേക്കാള് മൂന്ന് മുതല് നാല് ഡിഗ്രി സെല്ഷ്യസ് വരെ താപനില ഉയര്ന്നേക്കാം.
കോഴിക്കോട് ഉയര്ന്ന താപനില 37 ഡിഗ്രി വരെയും തിരുവനന്തപുരം, കണ്ണൂര് ജില്ലകളില് ഉയര്ന്ന താപനില 36 ഡിഗ്രി വരെയും ഉയരുമെന്നാണ് മുന്നറിയിപ്പ്. പകല് സമയങ്ങളില് പുറത്തിറങ്ങുന്നവര് സൂര്യാഘാത സാധ്യത കണക്കിലെടുത്ത് സൂര്യപ്രകാശം നേരിട്ട് ഏല്ക്കാതിരിക്കാന് ശ്രദ്ധിക്കണം. പകല് 11 മണി മുതല് 3 വരെ പ്രത്യേക ജാഗ്രത പാലിക്കണമെന്ന് നിര്ദ്ദേശമുണ്ട്. വെള്ളം കുടിക്കണമെന്ന് തോന്നുന്നില്ലെങ്കിലും നിര്ജലീകരണം ഒഴിവാക്കാന് ധാരാളം വെള്ളം കുടിക്കണമെന്നും ആരോഗ്യവകുപ്പ് നിര്ദ്ദേശിക്കുന്നു.
