കൊച്ചി: നടിയെ അക്രമിച്ച കേസില് നടന് ദിലീപിനെതിരെ ആഞ്ഞടിച്ച് ഡബ്ബിങ്ങ് ആര്ട്ടിസ്റ്റ് ഭാഗ്യലക്ഷ്മി. മെമ്മറി കാര്ഡ് പരിശോധിച്ച കേസിലെ അന്വേഷണ റിപ്പോര്ട്ടിന്റെ മൊഴിപ്പകര്പ്പ് അതിജീവിതക്ക് നല്കരുതെന്ന് ഹൈക്കോടതിയില് അപ്പീല് നല്കിയതിനെതിരെയാണ് ഭാഗ്യലക്ഷ്മി പ്രതികരിച്ചത്.
മൊഴിപ്പകര്പ്പ് കൊടുക്കരുതെന്ന് പറയാന് ദിലീപ് ആരാണെന്നും കയ്യില് പണമുണ്ടെന്ന് കരുതി എന്തും ചെയ്യാമെന്നാണോ ദിലീപ് കരുതുന്നതെന്നും ഭാഗ്യലക്ഷ്മി തന്റെ ഇന്സ്റ്റഗ്രാമില് കുറിച്ചു. മൊഴിപ്പകര്പ്പ് അതിജീവിതയുടെ അവകാശമാണ്. അത് ദിലീപിന്റെ ഔദാര്യമല്ല. മൊഴിപ്പകര്പ്പ് ദിലീപ് നിര്മ്മിക്കുന്ന സിനിമയുടെ സ്ക്രിപ്റ്റ് അല്ലെന്നും ഭാഗ്യലക്ഷ്മി കുറിച്ചു.
തെറ്റ് ചെയ്തിട്ടില്ലെന്ന് ഉറപ്പുണ്ടെങ്കില് മൊഴിപ്പകര്പ്പ് കൊടുക്കാന് ദിലീപ് പറയണം, അതല്ലേ വേണ്ടത്. കൊടുക്കരുതെന്ന് പറയാന് താങ്കള്ക്ക് എന്താണ് അധികാരം. അത് കോടതി പറയട്ടെ. മെമ്മറി കാര്ഡ് ആക്സസ് ചെയ്യപ്പെട്ടിട്ടുണ്ടെന്ന് കോടതിയില് പരാതി നല്കിയത് അവളാണ്. അപ്പോള് അതിന്റെ റിപ്പോര്ട്ടിന്റെ അവകാശം അവള്ക്കല്ലേയെന്നും അവര് ഇന്സ്റ്റാഗ്രാമിലൂടെ പങ്കുവെച്ചു.
