തിരുവനന്തപുരം: മാസപ്പടി വിഷയത്തില് അവസാനം വരെ പോരാടുമെന്ന് എംഎല്എ മാത്യു കുഴല്നാടന്. കോടതിവിധി നിയമപരമായ തിരിച്ചടിയാണ്. കേസ് കൂടുതല് പഠിക്കും. അതിന് ശേഷം ഭാവി കാര്യങ്ങള് തീരുമാനിക്കുമെന്നും അദ്ദേഹം മാധ്യമങ്ങളോട് പ്രതികരിച്ചു. മുഖ്യമന്ത്രി പിണറായി വിജയനും മകള് വീണ വിജയനുമെതിരെ മാസപ്പടി വിഷയത്തില് അന്വേഷണം ആവശ്യപ്പെട്ട് സമര്പ്പിച്ച ഹര്ജിയാണ് കോടതി തള്ളിയത്. എന്നാല്, താന് നല്കിയ തെളിവുകള് കേസില് പ്രാഥമിക അന്വേഷണം നടത്താന് പര്യാപ്തമാണ് എന്നാണ് എന്റെ ധാരണയെന്നും അദ്ദേഹം പറഞ്ഞു.
താന് ഉന്നയിച്ച വാദങ്ങള് കോടതിക്ക് ഉള്ക്കൊള്ളാന് കഴിഞ്ഞില്ല എന്നതാണ് ഹര്ജി തള്ളാന് കാരണം. കോടതി ഉത്തരവ് പഠിച്ചതിന് ശേഷം തൃപ്തികരമല്ലെങ്കില് അപ്പീല് പോകും. താന് നിയമപ്പരമായി ഏതറ്റം വരേയും പോകും. ഒളിച്ചോടാന് ഉദ്ദേളിക്കുന്നില്ല. കേസില് കോടതിയുടെ മേല്നോട്ടത്തിലുള്ള അന്വേഷണമാണ് താന് ആഗ്രഹിച്ചതെന്നും മാത്യു കുഴല്നാടന് പ്രതികരിച്ചു. സിഎംആര്എല് കമ്പനിക്ക് സംസ്ഥാന സര്ക്കാര് വഴിവിട്ട് സഹായങ്ങള് നല്കിയെന്നായിരുന്നു ആരോപണം. തിരുവനന്തപുരം വിജിലന്സ് കോടതിയാണ് ഹര്ജി തള്ളിയത്. വിജിലന്സ് അന്വേഷണം വേണമെന്ന ആവശ്യവും കോടതി മേല്നോട്ടത്തില് അന്വേഷണം വേണമെന്ന ആവശ്യവും തള്ളി.
