തിരുവനന്തപുരം: റോഡ് അപകടങ്ങളും മരണനിരക്കും ഉയരുന്ന സാഹചര്യത്തില് കര്ശന നടപടി സ്വീകരിക്കാന് ഒരുങ്ങി ഗതാഗതമന്ത്രി കെ ബി ഗണേഷ് കുമാര്. ബസിലെ ജീവനക്കാരെ നിയമിക്കുന്നത് മുതല് പെര്മിറ്റ് അടക്കമുള്ള കാര്യങ്ങളില് കര്ശന നടപടി സ്വീകരിക്കാനാണ് തീരുമാനം. സ്വകാര്യ ബസ് ഇടിച്ചുണ്ടാകുന്ന അപകടങ്ങളിലും ബസിലെ ഡ്രൈവിങ് സംബന്ധിച്ച് ഉയരുന്ന പരാതികള്ക്കും പരിഹാരം കാണാന് പ്രത്യേക സംവിധാനം ഒരുക്കാനും തീരുമാനിച്ചിട്ടുണ്ട്. സ്വകാര്യ ബസ് ഉടമകളുടെ സംഘടനാ പ്രതിനിധികളുമായി നടത്തിയ ചര്ച്ചയിലാണ് ഇക്കാര്യങ്ങള് തീരുമാനിച്ചത്.
സ്വകാര്യ ബസുകളില് ഡ്രൈവര്, കണ്ടക്ടര്, ക്ലീനര് എന്നിവരെ നിയമിക്കുന്ന് കൃത്യമായ മാനദണ്ഡങ്ങള് പാലിക്കാതെയാണെന്ന് മന്ത്രി വിലയിരുത്തി. അതേ സമയം, സ്വകാര്യ ബസ് ഇടിച്ച് ഉണ്ടാകുന്ന അപകടങ്ങളില് മരണമുണ്ടായാല് ബസിന്റെ പെര്മിറ്റ് ആറ് മാസത്തേയ്ക്ക് റദ്ദാക്കാനാണ് തീരുമാനമായത്. അപകടത്തില് ഗുരുതര പരിക്കുണ്ടായാല് പെര്മിറ്റ് മൂന്ന് മാസത്തേയ്ക്കും സസ്പെന്ഡ് ചെയ്യും. അതോടൊപ്പം ബസ് ഓടിക്കുന്നയാളുടെ ഡ്രൈവിങ് ലൈസന്സ് സസ്പെന്ഡ് ചെയ്യുന്ന നടപടി തുടരുമെന്നും മന്ത്രി അറിയിച്ചു. സംസ്ഥാനത്ത് സ്വകാര്യ ബസുകളുടെ മത്സരയോട്ടത്തില് നിരവധി ജീവനുകള് നഷ്ടമായ സാഹചര്യത്തിലാണ് ഇത്തരത്തിലൊരു നടപടി.
