തൃശൂര്: മലയാളത്തിന്റെ പ്രിയ ഗായകന് പി ജയചന്ദ്രന് അന്തരിച്ചു. 81 വയസായിരുന്നു. ഇന്ന് വൈകിട്ട് ഏഴ് മണിക്ക് പൂങ്കുന്നത്തെ വീട്ടില് കുഴഞ്ഞ് വീണതിനെ തുടര്ന്ന് തൃശൂര് അമല ആശുപത്രിയില് പ്രവേശിപ്പിച്ചെങ്കിലും മരണം സംഭവിക്കുകയായിരുന്നു. 7.54 നാണ് മരണം സ്ഥിരീകരിച്ചത്. അര്ബുദ രോഗത്തെ തുടര്ന്ന് കഴിഞ്ഞ കുറച്ചു വര്ഷങ്ങളായി തൃശൂര് അമല ആശുപത്രിയില് ചികിത്സയിലായിരുന്നു.
മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലായി 16000 ലേറെ ഗാനങ്ങള് പി ജയചന്ദ്രന് പാടിയിട്ടുണ്ട്. ഒരു തവണ മികച്ച പിന്നണി ഗായകനുള്ള ദേശീയ പുരസ്കാരം നേടിയ ജയചന്ദ്രന് അഞ്ചുതവണ മികച്ച പിന്നണി ഗായകനുള്ള കേരള സംസ്ഥാന അവാര്ഡുകളും നാലു തവണ തമിഴ്നാട് സംസ്ഥാന അവാര്ഡുകളും നേടിയിട്ടുണ്ട്.
1944 മാര്ച്ച് മൂന്നിന് എറണാകുളം ജില്ലയിലെ രവിപുരത്താണ് ജനനം. രവി വര്മ്മ കൊച്ചനിയന് തമ്പുരാന്റെയും പാലിയത്ത് സുഭദ്രക്കുഞ്ഞമ്മയുടേയും അഞ്ച് മക്കളില് മൂന്നാമന്. 1958 ലെ സംസ്ഥാന യുവജനമേളയില് പങ്കെടുക്കവേ ജയചന്ദ്രന് തന്റെ സമകാലികനായ യേശുദാസിനെ കണ്ടുമുട്ടുകയും മികച്ച ക്ലാസിക്കല് ഗായകനുള്ള പുരസ്കാരം യേശുദാസ് നേടിയപ്പോള് അതേ വര്ഷം മികച്ച മൃദംഗവിദ്വാനുള്ള പുരസ്കാരം നേടുകയും ചെയ്തിരുന്നു.
