തിരുവനന്തപുരം: ഭാവഗായകന് പി ജയചന്ദ്രന്റെ വിയോഗത്തില് അനുശോചനം രേഖപ്പെടുത്തി പ്രതിപക്ഷ നേതാവ് വിഡി സതീശന്. മലയാളി വീണ്ടും വീണ്ടും കേള്ക്കണമെന്ന് തോന്നുന്ന അപൂര്വ ശബ്ദങ്ങളില് ഒന്ന്. കാലഭേദമില്ലാതെ തലമുറകള് ഏറ്റെടുത്ത ശബ്ദം. പ്രായമേ നിങ്ങള്ക്ക് തളര്ത്താനാകില്ലെന്ന വാശിയോടെ വീണ്ടും വീണ്ടും മുഴങ്ങിയ ശബ്ദം. പാട്ടിന്റെ ഋതുഭേദങ്ങള് സമ്മാനിച്ച് എന്നും നിലനിലക്കുന്ന ഓര്മ്മകളായി പി ജയചന്ദ്രന് മടങ്ങുന്നു. ഭാവദീപ്തിയുടെ സ്വരമാധുര്യംനിലച്ചുവെന്നും വിഡി സതീശന് ഫേയ്സ്ബുക്കില് കുറിച്ചു.
ഇന്നലെ വൈകിട്ട് പൂങ്കുന്നത്തെ വീട്ടില് കുഴഞ്ഞുവീണതിനെ തുടര്ന്നാണ് പി ജയചന്ദ്രനെ തൃശൂര് അമല ആശുപത്രിയില് എത്തിച്ചത്. 7.45 ഓടെ മരണം സ്ഥിരീകരിക്കുകയായിരുന്നു. 1944 മാര്ച്ച് മൂന്നിന് എറണാകുളം ജില്ലയിലെ രവിപുരത്ത് രവി വര്മ്മ കൊച്ചനിയന് തമ്പുരാന്റെയും പാലിയത്ത് സുഭദ്രക്കുഞ്ഞമ്മയുടേയും അഞ്ച് മക്കളില് മൂന്നാമനായാണ് ജനനം. മൃതദേഹവും വഹിച്ചുള്ള ആംബുലന്സ് പൂങ്കുന്നത്തെ വീട്ടിലെത്തി. ഇതിനുശേഷം സംഗീതനാടക അക്കാദമി ഹാളില് പൊതുദര്ശനം നടത്തും. തുടര്ന്ന് വീട്ടിലേക്ക് തിരിച്ചുകൊണ്ടുവരും. ശനിയാഴ്ച വൈകീട്ട് 3.30ന് പറവൂര് ചേന്ദമംഗലം പാലിയം തറവാട് ശ്മശാനത്തിലാകും സംസ്കാര ചടങ്ങുകള് നടക്കുക.
