ദില്ലി: മൂന്നാം മോദി മന്ത്രി സഭയില് കേന്ദ്ര സഹമന്ത്രിമാരായി സത്യപ്രതിജ്ഞ ചെയ്ത് സുരേഷ് ഗോപിയും ജോര്ജ്ജ് കുര്യനും. ഇംഗ്ലീഷില് ദൈവനാമത്തിലാണ് സുരേഷ്ഗോപി സത്യപ്രതിജ്ഞ ചെയ്തത്. 51-മതായാണ് സുരേഷ് ഗോപി സത്യപ്രതിജ്ഞ ചെയ്ത് അധികാരമേറ്റത്. സംസ്ഥാന ജനറല് സെക്രട്ടറിയായ ജോര്ജ് കുര്യനും ഇംഗ്ലീഷില് ദൈവനാമത്തിലാണ് സത്യപ്രതിജ്ഞ ചെയ്തത്. നേരത്തെ ദേശീയ ന്യൂനപക്ഷ കമ്മീഷനില് വൈസ് ചെയര്മാനായിരുന്നു ജോര്ജ് കുര്യന്. ക്രിസ്ത്യന് ന്യൂനപക്ഷ പ്രതിനിധിയെന്ന നിലയിലാണ് ജോര്ജ് കുര്യന് മന്ത്രിസഭയില് അംഗത്വം ലഭിച്ചത്.
ബിജെപി ദില്ലി കേന്ദ്ര നേതൃത്വവുമായുളള ബന്ധമാണ് ജോര്ജിന് തുണയായത്. ക്രിസ്ത്യന് ന്യൂനപക്ഷ പ്രതിനിധിയെന്ന നിലയിലാണ് മന്ത്രിസഭയില് അംഗത്വം ലഭിച്ചത്. ജോര്ജ് കുര്യന് ഇപ്പോള് ഡല്ഹിയില് തുടരുന്നുണ്ട്. കേരളത്തില് മാത്രമല്ല, ദേശീയ തലത്തില് തന്നെ ക്രിസ്ത്യന് വിഭാഗങ്ങളെ ബി ജെ പിയിലേക്ക് എത്തിക്കാന് നിര്ണ്ണായക പ്രവര്ത്തനങ്ങള് നടത്തുന്ന വ്യക്തി കൂടിയാണ് ജോര്ജ് കുര്യന്. സുരേഷ്ഗോപിയുടെ കേന്ദ്രമന്ത്രി സ്ഥാനത്തെ ചൊല്ലിയുള്ള ചര്ച്ചകള് ഇന്ന് രാവിലെ വരേയും നില നില്ക്കുന്നുണ്ടായിരുന്നു. എന്നാല് നരേന്ദ്ര മോദി നേരിട്ട് വിളിച്ചതോടെയാണ് സുരേഷ്ഗോപി ദില്ലിക്ക് പുറപ്പെട്ടത്. തൃശൂര് എടുത്തത് മുതല് ഉറപ്പിച്ചതായിരുന്നു സുരേഷ് ഗോപിയുടെ മന്ത്രിസ്ഥാനം. പക്ഷെ ഇന്നലെ രാത്രി മുതലാണ് പലതരം അഭ്യൂഹങ്ങളും സംശയങ്ങളുമുയര്ന്നത്.
