നിലവിലുള്ള ഇന്ത്യന് ക്രിമിനല് നിയമങ്ങളെ പൊളിച്ചെഴുതിക്കൊണ്ടുള്ള സുപ്രധാന ബില്ലുകള്ക്ക് രാഷ്ട്രപതിയുടെ അംഗീകാരം. ലോക്സഭയും രാജ്യസഭയും പാസാക്കിയ ബില്ലുകളില് രാഷ്ട്രപതി ഒപ്പുവച്ചു. ഇതോടെ ഐപിസി, സിആര്പിസി, ഇന്ത്യന് തെളിവു നിയമം എന്നിവയ്ക്കുപകരമായി അവതരിപ്പിക്കപ്പെട്ട ഭാരതീയ ന്യായ സംഹിത, ഭാരതീയ നാഗരിക് സുരക്ഷാ സംഹിത, ഭാരതീയ സാക്ഷ്യ ബില്ല് എന്നിവ നിയമമായി. ശീതകാല സമ്മേളനത്തില് അവതരിപ്പിച്ച ബില്ലുകളാണ് സഭകള് പാസാക്കിയത്.
പുതിയ നിയമങ്ങള് പ്രകാരം ആള്ക്കൂട്ട ആക്രമണങ്ങള് ക്രിമിനല് കുറ്റമാവും. ഭരണകൂടത്തിന് എതിരായ പ്രവര്ത്തനങ്ങള് കുറ്റകരമാക്കുന്ന വകുപ്പ് ഒഴിവാക്കി. എന്നാല്, ഭാരതീയ ന്യയാസംഹിതാ ബില്ലില് 150-ാം വകുപ്പ് രാജ്യദ്രോഹത്തെ കുറ്റകൃത്യമമായി നിലനിര്ത്തിയിട്ടുണ്ട്. ഏതു കേസിലും നിലവിലെ പൊലീസ് കസ്റ്റഡി കാലാവധി, അറസ്റ്റിനുശേഷമുള്ള ആദ്യത്തെ പതിനഞ്ചുദിവസമാണ്. ഇതിനപ്പുറവും പൊലീസ് കസ്റ്റഡി നീട്ടാനുതകുന്ന വ്യവസ്ഥ ഭാരതീയ നാഗരിക് സുരക്ഷാസംഹിതാ ബില്ലിലുണ്ട്. അതേസമയം, അന്വേഷണവും കുറ്റപത്രസമര്പ്പണവുമടക്കമുള്ള നടപടികള്ക്ക് സമയപരിധി നിശ്ചയിച്ചിട്ടുമുണ്ട്.
ഓഗസ്റ്റ് 11-ന് കേന്ദ്ര ആഭ്യന്തരമന്ത്രി അമിത് ഷാ ആണ് പാര്ലമെന്റില് ആദ്യ ബില്ലുകള് അവതരിപ്പിച്ചത്. പിന്നീട് സ്റ്റാന്ഡിങ് കമ്മിറ്റിക്ക് വിടുകയും നവംബര് പത്തിന് കമ്മിറ്റി റിപ്പോര്ട്ട് സമര്പ്പിച്ചതിന് പിന്നാലെ ഡിസംബര് 11-ന് ബില്ലുകള് പിന്വലിക്കുകയുമായിരുന്നു.
