കേരളത്തിലെ രണ്ടാമത്തെ വലിയ കൊടുമുടിയായ അഗസ്ത്യാര്കൂടം സീസൺ ട്രക്കിംങിനായുള്ള ഓൺലൈൻ രജിസ്ട്രേഷൻ നാളെ മുതൽ ആരംഭിക്കും. നാളെ രാവിലെ 11 മണി മുതൽ ആളുകൾക്ക് രജിസ്ട്രർ ചെയ്തു തുടങ്ങാവുന്നതാണ്. ദിവസവും 70 പേർക്കാണ് ഓൺലൈൻ രജിസ്ട്രേഷൻ അനുവദിക്കുക. ജനുവരി 24 മുതൽ മാർച്ച് രണ്ട് വരെയാണ് ട്രക്കിംഗ്.
വനം വകുപ്പിൻ്റെ www.forest.kerala.in എന്ന വെബ്സൈറ്റ് സന്ദർശിച്ച് serviceonline.gov.in/trekking എന്ന ലിങ്കിൽ ഓൺലൈനായി രജിസ്റ്റർ ചെയ്ത് ബുക്ക് ചെയ്യാവുന്നതാണ്. ഓണ്ലൈന് രജിസ്ട്രേഷന് ഫോട്ടോയും, സര്ക്കാര് അംഗീകരിച്ച ഐഡിയും അപ്ലോഡ് ചെയ്യേണ്ടതാണ്. 14 വയസ് മുതൽ 18 വയസു വരെയുള്ളവര്ക്ക് രക്ഷാകര്ത്താവിനോടൊപ്പമോ രക്ഷിതാവിന്റെ അനുമതി പത്രത്തോടൊപ്പമോ മാത്രമാണ് യാത്ര അനുവദിക്കൂ.
7 ദിവസത്തിനകം എടുത്ത ഫിറ്റ്നസ് സര്ട്ടിഫിക്കറ്റ് ട്രക്കിംഗ് ആരംഭിക്കുന്നതിന് മുന്പായി ഹാജരാക്കണം. ഭക്ഷണം ഇല്ലാതെ ഇക്കോ ഡെവലപ്മെന്റ് ചാര്ജ് അടക്കം 2500 രൂപയാണ് ട്രെക്കിംഗ് ഫീസ്. ബോണക്കാട്, അതിരുമല എന്നിവിടങ്ങളില് ഇക്കോ ഡെവലപ്മെന്റ് കമ്മിറ്റിയുടെ കാന്റീനുകളുണ്ടാകും. പ്രതികൂല കാലാവസ്ഥ, വന്യജീവി ആക്രമണ സാധ്യത എന്നിവയുണ്ടെങ്കില് ഏത് സമയത്തും ട്രക്കിംഗ് നിര്ത്തി വയ്ക്കാനുള്ള അധികാരം വനംവകുപ്പിന് ഉണ്ടായിരിക്കുന്നതാണ്.
