ഇന്ത്യയുടെ ബോക്സിങ് ഇതിഹാസം മേരി കോം വിരമിച്ചു. ഇന്നു പുലര്ച്ചെയാണ് ബോക്സിങ്ങില് നിന്നു വിരമിക്കല് പ്രഖ്യാപിച്ചത്. മത്സരങ്ങളിൽ പങ്കെടുക്കുന്നതിന് പ്രായ പരിധി തടസമായതിനാലാണ് വിരമിക്കുന്നതെന്ന് മേരികോം പറഞ്ഞു.
മത്സരങ്ങളിൽ പങ്കെടുക്കാൻ ഇനിയും ആഗ്രഹമുണ്ട്. എന്നാൽ, 40 വയസിന് മുകളിലുള്ള താരങ്ങള്ക്ക് രാജ്യാന്തര ബോക്സിങ് അസോസിയേഷനു കീഴിലെ എലൈറ്റ് മത്സരങ്ങളില് പങ്കെടുക്കാന് അനുമതിയില്ലാത്തതിനാലാണ് വിരമിക്കാന് തീരുമാനിച്ചതെന്ന് നാല്പത്തിയൊന്നുകാരിയായ മേരി കോം പറഞ്ഞു. ബോക്സിങിൽ ഒളിമ്പിക് മെഡല് ജേതാവും ആറുതവണ ലോക ചാമ്പ്യനുമാണ് മേരി കോം. അഞ്ച് തവണ ഏഷ്യന് ചാമ്പ്യനുമായി. 2014-ല് ഏഷ്യന് ഗെയിംസില് സ്വര്ണ മെഡല് നേടിയതിലൂടെ, ഏഷ്യന് ഗെയിംസില് സ്വര്ണം ഇന്ത്യയില് നിന്നുള്ള ആദ്യ വനിതാ ബോക്സറായി മേരികോം മാറി.
2005, 2006, 2008, 2010 വര്ഷങ്ങളില് ലോകചാമ്പ്യനായ താരം 2012-ലെ ലണ്ടന് ഒളിമ്പിക്സില് വെങ്കല മെഡലും നേടി. 2003ലെ ആദ്യ ലോക ചാംപ്യന്പട്ടത്തിനു പിന്നാലെ രാജ്യം അര്ജുന അവാര്ഡ് നല്കി. 2009ല് ഖേല് രത്ന പുരസ്കാരവും ലഭിച്ചു. 2006ല് പത്മശ്രീ, 2013ല് പത്മഭൂഷണ്, 2020ല് പത്മവിഭൂഷണ് അംഗീകാരങ്ങളും മേരി കോമിന് ലഭിച്ചു. 2016 മുതല് 2022വരെ രാജ്യസഭാംഗമായിരുന്നു. നാലുവർഷത്തെ പ്രണയത്തിനുശേഷം ഫുട്ബോളർ കരുങ് ഓൺലറിനെ 2005ലാണ് മേരി കോം വിവാഹം ചെയ്തത്. തന്റെ ബോക്സിങ് യാത്രയിൽ ഭർത്താവിനുള്ള പങ്കിനെ കുറിച്ച് പലതവണ മേരി കോം തുറന്നുപറഞ്ഞിരുന്നു. ഇരട്ടക്കുട്ടികള് ഉൾപ്പെടെ മൂന്ന് ആൺകുട്ടികളാണ് ദമ്പതികൾക്കുള്ളത്. 2018ൽ ഒരു പെൺകുട്ടിയെ ദത്തെടുത്തു.