ആലപ്പുഴ: ബിജെപി ഒബിസി മോര്ച്ച സംസ്ഥാന സെക്രട്ടറിയായിരുന്ന അഡ്വ രണ്ജിത്ത് ശ്രീനിവാസ് കൊലപാതക കേസില് പ്രതികള്ക്കുള്ള ശിക്ഷ ഇന്ന് വിധിക്കും. രഞ്ജിത്ത് ശ്രീനിവാസനെ ആലപ്പുഴ വെള്ളക്കിണറിലുള്ള വീട്ടില് കയറി അമ്മയുടെയും ഭാര്യയുടെയും മകളുടെയും മുന്നിലിട്ട് വെട്ടി കൊലപ്പെടുത്തി എന്നതാണ് കേസ്. പോപ്പുലര് ഫ്രണ്ട് പ്രവര്ത്തകരായ 15 പ്രതികളെ കുറ്റക്കാരെന്ന് കോടതി കണ്ടെത്തുകയായിരുന്നു.
രാവിലെ 11ന് മാവേലിക്കര അഡീഷണല് സെഷന്സ് കോടതി ജഡ്ജി വിജി ശ്രീദേവിയാണ് ശിക്ഷ വിധിക്കുന്നത്. അപൂര്വങ്ങളില് അപൂര്വമായ കേസാണ് ഇതെന്നും പരമാവധി ശിക്ഷ നല്കണമെന്നുമാണ് പ്രോസിക്യൂഷന് വാദിച്ചിരിക്കുന്നത്. കേസിന്റെ പ്രാധാന്യം കണക്കിലെടുത്ത് ആലപ്പുഴ ജില്ലയില് പൊലീസ് കനത്ത ജാഗ്രതയിലാണ്.
