ജയ്പൂര്; തെരഞ്ഞെടുപ്പിനോടനുബന്ധിച്ച് നടന്ന പരീക്ഷാപേപ്പര് ചോര്ച്ചയുമായി ബന്ധപ്പെട്ട കള്ളപ്പണം വെളുപ്പിക്കല് അന്വേഷണത്തിന്റെ ഭാഗമായി രാജസ്ഥാന് കോണ്ഗ്രസ് അധ്യക്ഷന്റെ വസതിയില് ഇഡി റെയ്ഡ്. ഗോവിന്ദ് സിംഗ് ദോതസ്രയുടെയും മഹുവ നിയമസഭാ മണ്ഡലത്തിലെ പാര്ട്ടി സ്ഥാനാര്ത്ഥിയുടെയും സ്ഥാപനങ്ങളില് എന്ഫോഴ്സ്മെന്റ് ഡയറക്ടറേറ്റ് റെയ്ഡ് നടത്തി.
ദൗസയിലെ മഹുവ സീറ്റില് നിന്നുള്ള പാര്ട്ടി സ്ഥാനാര്ത്ഥി ഓംപ്രകാശ് ഹുഡ്ലയുടെ വസതിയിലും റെയ്ഡ് പുരോഗമിക്കുകയാണ്. 200 അംഗ രാജസ്ഥാന് നിയമസഭയിലേക്കുള്ള തിരഞ്ഞെടുപ്പ് നവംബര് 25ന് നടക്കും. ബി.ജെ.പിയുടെ സുഭാഷ് മഹാരിയയ്ക്കെതിരെ സിക്കാറിലെ ലച്ച്മംഗഢ് മണ്ഡലത്തിലെ പാര്ട്ടി സ്ഥാനാര്ത്ഥിയാണ് ദോതസ്ര. ഈ മണ്ഡലത്തിലെ സിറ്റിംഗ് എംഎല്എ കൂടിയാണ് അദ്ദേഹം
ഈ കേസില് മുന് ആര്പിഎസ്സി അംഗം ബാബുലാല് കത്താറയെയും അനില്കുമാര് മീണ എന്ന മറ്റൊരാളെയും ഇഡി അറസ്റ്റ് ചെയ്തു. ജൂണില് ഈ അന്വേഷണത്തിന്റെ ഭാഗമായി രാജസ്ഥാനിലെ ഒന്നിലധികം സ്ഥലങ്ങളില് ആദ്യം റെയ്ഡ് നടത്തിയിരുന്നു.
