തിരുവന്തപുരം: സംസ്ഥാനത്ത് വൈദ്യുതി ഉപയോഗം റെക്കോര്ഡുകള് തകര്ത്ത് മുന്നേറുകയാണ്. മാര്ച്ച് 27ന് ഉപയോഗിച്ച 10.46 കോടി യൂണിറ്റ് എന്ന റെക്കോര്ഡ് മറി കടന്ന് കഴിഞ്ഞ തിങ്കളാഴ്ച വൈദ്യുതി ഉപയോഗം 10.48 കോടി യൂണിറ്റായി. ഈ മാസവും യൂണിറ്റിന് 19 പൈസ സര്ച്ചാര്ജ് തുടരും.
ഉപയോഗം കൂടുമ്പോള് അമിത വിലയ്ക്ക് വൈദ്യുതി പവര് എക്സ്ചേഞ്ചില് നിന്ന് വാങ്ങിയാണ് കെഎസ്ഇബി വിതരണം ചെയ്യുന്നത്. 300 മുതല് 600 മെഗാവാട്ട് വരെ വൈദ്യുതി ഉയര്ന്ന വിലയ്ക്ക് വാങ്ങിയാണ് നിലവില് പ്രതിസന്ധി ഒഴിവാക്കുന്നത്. പീക്ക് സമയങ്ങളില് വൈദ്യുതി ഉപയോഗത്തിക്കുന്നതിനെ കുറിച്ച് കെഎസ് ഇബി പ്രത്യേകം മുന്നറിയിപ്പ് ഉപഭോക്താക്കള്തക്ക് നല്കിയിട്ടുണ്ട്.
സംസ്ഥാനത്ത് ദിനം പ്രതി ചൂട് കൂടുകയാണ്. വരും ദിവസങ്ങളില് ഉഷ്ണതരംഗത്തിന് സാധ്യതയുണ്ടാവുമെന്നും മുന്നറിയിപ്പ് നല്കിയിട്ടുണ്ട്. ഏപ്രില് 6 വരെ കൊല്ലം, പാലക്കാട് ജില്ലകളില് ഉയര്ന്ന താപനില 39°C തുടരും. പത്തനംതിട്ട, കോട്ടയം, തൃശ്ശൂര്, കോഴിക്കോട് ജില്ലകളില് ഉയര്ന്ന താപനില 37°C വരെയും, ആലപ്പുഴ, എറണാകുളം, മലപ്പുറം, കണ്ണൂര്, കാസര്ഗോഡ് ജില്ലകളില് ഉയര്ന്ന താപനില 36°C വരെയും ഉയരാന് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചുു.
