ഹൈദരാബാദ്: തെലങ്കാനയിലെ സംഗറെഡ്ഡി ജില്ലയില് കെമിക്കല് ഫാക്ടറിയിലെ റിയാക്ടര് പൊട്ടിത്തെറിച്ച് അഞ്ച് പേര് മരിക്കുകയും 10 പേര്ക്ക് പരിക്കേല്ക്കുകയും ചെയ്തു. ഇനിയും നിരവധി പേര് കുടുങ്ങിക്കിടക്കുന്നുണ്ടെന്നാണ് വിവരം. അതായത് മരിച്ചവരുടെ എണ്ണം ഗണ്യമായി വര്ദ്ധിച്ചേക്കാം. സ്ഫോടനസമയത്ത് 50 പേര് കെട്ടിടത്തില് ഉണ്ടായിരുന്നതായി പ്രാദേശിക റിപ്പോര്ട്ടുകള് സൂചിപ്പിക്കുന്നു.
എസ്.ബി. ഓര്ഗാനിക്സ് ലിമിറ്റഡ് എന്ന ഫാര്മസ്യൂട്ടിക്കല് കമ്പനിയുടെ ഫാക്ടറിയിലാണ് അപകടമുണ്ടായത്. അപകടത്തില് മരണസംഖ്യ ഇനിയും ഉയര്ന്നേക്കാം. രക്ഷാപ്രവര്ത്തനം തുടരുകയാണ്. മരിച്ചവരില് ഒരാള് ഫാക്ടറി മാനേജരാണെന്ന് കരുതുന്നു. അതേ സമയം, കെട്ടിടത്തിലെ മറ്റൊരു റിയാക്ടര് പൊട്ടിത്തെറിക്കുമെന്ന ആശങ്കയുണ്ടെന്ന് പ്രാദേശിക മാധ്യമങ്ങള് പറഞ്ഞു. അധികൃതര് ചുറ്റുമുള്ള പ്രദേശങ്ങളില് നിന്ന് ആളുകളെ ഒഴിപ്പിക്കാന് തുടങ്ങിയിട്ടുണ്ട്.
