തിരുവനന്തപുരം: ലോക്സഭ തെരഞ്ഞെടുപ്പിനായി സംസ്ഥാനത്ത് ഒരു മാസത്തിലേറെയായി നീണ്ടുനിന്ന പരസ്യ പ്രചാരണങ്ങള്ക്ക് തിരശ്ശീല വീഴാന് മണിക്കൂറുകള് മാത്രം ബാക്കി. പ്രചരണപരിപാടികള് ആവേശകരമായ കലാശക്കൊട്ടിലേക്ക് നീങ്ങുമ്പോള് മൂന്ന് മുന്നണികളും 20 മണ്ഡലങ്ങളിലെയും പ്രധാന കേന്ദ്രങ്ങളിലേക്ക് ഒഴുകി എത്തി കൊണ്ടിരിക്കുകയാണ്. വൈകീട്ട് ആറുമണിയോടെ പരസ്യ പ്രചാരണങ്ങള് സമാപിക്കും.
അതേ സമയം, തിരുവനന്തപുരത്തിന് പുറമേ തൃശൂര്, കാസര്കോട്, പത്തനംതിട്ട ജില്ലകളിലും നിരോധനാജ്ഞ പ്രഖ്യാപിച്ചു. ഇന്ന് വൈകീട്ട് ആറുമണി മുതല് ശനിയാഴ്ച വരെയാണ് നിരോധനാജ്ഞ. പത്തനംതിട്ടയില് നാളെ വൈകീട്ട് ആറുമണി മുതലാണ് ജില്ലാ കലക്ടര് നിരോധനാജ്ഞ പ്രഖ്യാപിച്ചിരിക്കുന്നത്.
സംഘര്ഷം ഒഴിവാക്കാന് മാര്ഗനിര്ദേശങ്ങള് പുറത്തിറക്കിയതിന് പുറമേ, കലാശക്കൊട്ട് കേന്ദ്രങ്ങളും ജില്ലാ തെരഞ്ഞെടുപ്പ് ഉദ്യോഗസ്ഥര് നിശ്ചയിച്ച് നല്കുകയായിരുന്നു. സംസ്ഥാനത്ത് ഏപ്രില് 26ന് രാവിലെ ഏഴുമണി മുതല് വൈകീട്ട് ആറുവരെയാണ് വോട്ടെടുപ്പ്. നാളെ നിശബ്ദ പ്രചാരണം. ജൂണ് നാലിനാണ് വോട്ടെണ്ണല്.
