തൃശൂര്: വെസ്റ്റ് നൈല് ഫീവര് ബാധിച്ച് തൃശ്ശൂരില് ഒരു മരണം. 79 വയസുള്ള നടുവേലിക്കര സ്വദേശിയുടെ മരണം വെസ്റ്റ് നൈല് ഫിവര് ബാധിച്ചാണെന്ന് സ്ഥിരീകരിച്ചു. ഈ വര്ഷം വെസ്റ്റ് നൈല് ബാധയെ തുടര്ന്നുള്ള ആദ്യ മരണമാണിത്. രോഗിക്ക് വാര്ധക്യ സഹജമായ രോഗങ്ങള് ഉണ്ടായിരുന്നതായി ജില്ല മെഡിക്കല് ഓഫീസര് അറിയിച്ചു. പനിയെ തുടര്ന്ന് രണ്ടാഴ്ച മുമ്പാണ് രോഗിയെ ആശുപത്രിയില് പ്രവേശിപ്പിച്ചത്. ആശുപത്രിയില് ചികിത്സയിലിരിക്കെ ഈ മാസം 3 നാണ് രോഗി മരിച്ചത്. ആലപ്പുഴ എന്ഐവിയില് നടത്തിയ പരിശോധനയിലാണ് രോഗം സ്ഥീരികരിച്ചത്.
സംസ്ഥാനത്ത് വെസ്റ്റ് നൈല് പനി സ്ഥിരീകരിച്ച പശ്ചാത്തലത്തില് ആരോഗ്യവകുപ്പ് ജാഗ്രത പുറപ്പെടുവിച്ചിരുന്നു. പത്ത് പേര്ക്കാണ് രോഗം സ്ഥിരീകരിച്ചത്. ഇതില് അഞ്ച് പേര് രോഗമുക്തരായിട്ടുണ്ട്. കോഴിക്കോട്, മലപ്പുറം, തൃശ്ശൂര് ജില്ലകളിലാണ് രോഗം ഇതുവരെ സ്ഥിരീകരിച്ചത്. ക്യൂലക്സ് കൊതുക് വഴി പരത്തുന്ന ഒരു പകര്ച്ചവ്യാധിയാണ് വെസ്റ്റ് നൈല് പനി. വൈസ്റ്റ് നൈല് പനി മുതിര്ന്നവരിലാണ് കാണുന്നത്. കൊതുകു ജന്യ രോഗമായതുകൊണ്ട് തന്നെ മഴക്കാല പൂര്വ്വ ശുചീകരണ പ്രവര്ത്തനങ്ങള് ഊര്ജിതമാക്കാന് ആരോഗ്യവകുപ്പ് നിര്ദ്ദേശം നല്കിയിട്ടുണ്ട്. പ്രവര്ത്തനങ്ങള് കൂടുതല് ശക്തമാക്കാന് വേണ്ടി ജില്ലാ മെഡിക്കല് ഓഫീസര്മാര്ക്ക് നിര്ദേശം നല്കിയിട്ടുണ്ട്.
