തിരുവനന്തപുരം: റെക്കോര്ഡ് വേഗത്തില് വിറ്റഴിച്ച് സംസ്ഥാന സര്ക്കാരിന്റെ തിരുവോണം ബംബര് ലോട്ടറികള്. ടിക്കറ്റ് വില്പ്പനയില് മുന്നില് നില്ക്കുന്നത് പാലക്കാട് ജില്ലയാണ്. നിലവില് അച്ചടിച്ച 40 ലക്ഷം ടിക്കറ്റുകളില് 36,41,328 ടിക്കറ്റുകള് വിറ്റുപോയി. സബ് ഓഫീസുകളിലേതുള്പ്പെടെ 6,59,240 ടിക്കറ്റുകളാണ് ഇവിടെ ഇതിനോടകം വിറ്റത്. തിരുവനന്തപുരവും തൃശൂരുമാണ് തൊട്ടുപിന്നിലുള്ളത്.
കേരളത്തില് മാത്രമാണ് സംസ്ഥാന ഭാഗ്യക്കുറിയുടെ വില്പനയെന്നും പേപ്പര് ലോട്ടറിയായി മാത്രമാണ് വില്ക്കുന്നതെന്നും കാട്ടി ബോധവത്കരണ പ്രചാരണം വകുപ്പ് ഊര്ജിതപ്പെടുത്തിയിട്ടുണ്ട്. 25 കോടി രൂപയാണ് തിരുവോണം ബമ്പറിന്റെ ഒന്നാം സമ്മാനം. രണ്ടാം സമ്മാനം ഒരു കോടി രൂപ വീതം 20 പേര്ക്ക്, മൂന്നാം സമ്മാനം 50 ലക്ഷം രൂപ, നാലും അഞ്ചും സമ്മാനങ്ങളായി യഥാക്രമം 5 ലക്ഷം, 2 ലക്ഷം, അവസാന സമ്മാനം 500 രൂപ എന്നിങ്ങനെയാണ് സമ്മാനത്തുക.
