തിരുവനന്തപുരം : 29-ാമത് അന്താരാഷ്ട്ര ചലച്ചിത്രോത്സവത്തിന്റെ ഡെലിഗേറ്റ് രജിസ്ട്രേഷന് നാളെ (നവംബര് 25) രാവിലെ 10ന് ആരംഭിക്കും. registration.iffk.in എന്ന ലിങ്കിലൂടെ ഡെലിഗേറ്റ് രജിസ്ട്രേഷന് നടത്താം. കേരള സംസ്ഥാന ചലച്ചിത്ര അക്കാദമി സംഘടിപ്പിക്കുന്ന ചലച്ചിത്രമേള ഡിസംബര് 13 മുതല് 20 വരെ തിരുവനന്തപുരത്ത് നടക്കും.
പൊതുവിഭാഗത്തിന് ജിഎസ്ടി ഉള്പ്പെടെ 1180 രൂപയും വിദ്യാര്ത്ഥികള്ക്ക് ജിഎസ്ടി ഉള്പ്പെടെ 590 രൂപയുമാണ് ഫീസ്. മുഖ്യവേദിയായ ടാഗോര് തിയറ്ററില് സജ്ജീകരിച്ചിട്ടുള്ള ഡെലിഗേറ്റ് സെല് മുഖേന നേരിട്ടും രജിസ്ട്രേഷന് നടത്താം. എട്ടുദിവസങ്ങളിലായി നടക്കുന്ന മേളയില് വിവിധ രാജ്യങ്ങളില്നിന്നുള്ള 180 ഓളം ചിത്രങ്ങള് പ്രദര്ശിപ്പിക്കും. 15 തിയറ്ററുകളിലായാണ് പ്രദര്ശനം.
