കണ്ണൂര്: വളപട്ടണത്ത് വ്യാപാരിയുടെ വീട്ടില് നിന്ന് ഒരു കോടി രൂപയും 300 പവനും കവര്ന്ന സംഭവത്തില് അന്വേഷണത്തില് വഴിത്തിരിവ്. മോഷണത്തിന്റെ പിറ്റേദിവസവും കള്ളന് ഇതേവീട്ടില് കയറിയതിന്റെ സിസിടിവി ദൃശ്യങ്ങള് പൊലീസിന് ലഭിച്ചു. പിറ്റേ ദിവസവും വീട്ടില് ആളില്ലെന്ന് കരുതിയാണ് മോഷ്ടാവ് എത്തിയതെന്നാണ് പോലീസ് നിഗമനം. മോഷണത്തിന് പിന്നില് വീട്ടുകാരെ നേരിട്ട് അറിയുന്നവരാണെന്നാണ് പൊലീസ് സംശയം.
അതേ സമം, കേസില് അന്വേഷണം മറ്റു സംസ്ഥാനങ്ങളിലേക്കും വ്യാപിപ്പിച്ചിട്ടുണ്ട്. കര്ണാടകയിലും തമിഴ്നാട്ടിലുമാണ് അന്വേഷണം നടക്കുന്നത്. രണ്ട് ദിവസങ്ങളില് വീട്ടിനകത്ത് കയറി മോഷണം നടത്തിയത് ഒരാള് ആണെങ്കിലും ഇയാള്ക്ക് കൃത്യമായ സഹായം ലഭിച്ചിട്ടുണ്ടെന്നാണ് പൊലീസ് നിഗമനം. വീടിന് അകത്ത് നിന്ന് ലഭിച്ച ഉളിയും 16 കൈ വിരല് അടയാളങ്ങളും കേസില് നിര്ണായകമായേക്കും. വീട്ടിനുള്ളിലെ മറ്റൊന്നും നശിപ്പിക്കാത്തതും അലമാരകള് മാത്രം കൊള്ളയടിച്ച സാഹചര്യത്തിലാണ് സംഭവം ആസൂത്രിതമെന്ന സംശയം ബലപ്പെടുത്തുന്നത്. മൂന്നു മോഷ്ടാക്കള് മതില് ചാടി വീട്ടുവളപ്പിലേക്ക് കടക്കുന്നത് സിസിടിവി ദൃശ്യങ്ങളില് പതിഞ്ഞിട്ടുണ്ട്.
