ന്യൂഡല്ഹി: ആശാ വര്ക്കര്മാരുടെ ഇന്സെന്റീവ് വര്ധിപ്പിക്കുന്നതും അവരെ തൊഴില് നിയമങ്ങളുടെ പരിധിയില് കൊണ്ടുവരുന്നതിനും കേന്ദ്രസര്ക്കാര് പരിഗണന നല്കുമെന്ന് ആരോഗ്യമന്ത്രി വീണാ ജോര്ജ് അറിയിച്ചു. കേന്ദ്ര ആരോഗ്യമന്ത്രി ജെ.പി. നഡ്ഡയുമായുള്ള കൂടിക്കാഴ്ചക്ക് ശേഷം ഡല്ഹിയില് മാധ്യമങ്ങളോട് സംസാരിക്കുകയായിരുന്നു അവര്.
“കേരളം മുന്നോട്ടുവച്ച ആശാ വര്ക്കര്മാരുടെ പ്രശ്നങ്ങള് ഉള്പ്പടെയുള്ള ആവശ്യങ്ങള് അദ്ദേഹം ശ്രദ്ധയോടെ കേട്ടു. ആശാ വര്ക്കര്മാരുടെ ഇന്സെന്റീവ് വര്ധിപ്പിക്കല് കേന്ദ്രസര്ക്കാരിന്റെ പരിഗണനയിലുണ്ടെന്ന് അദ്ദേഹം അറിയിച്ചു,” എന്ന് വീണാ ജോര്ജ് പറഞ്ഞു.
കൂടിക്കാഴ്ചയില് ചര്ച്ച ചെയ്ത മറ്റു വിഷയങ്ങള്:
വയനാട്ടിലും കാസര്കോടും മെഡിക്കല് കോളജുകള് സ്ഥാപിക്കാന് ആവശ്യപ്പെട്ടത്
ഓണ്ലൈന് ഡ്രഗ്സ് വില്പന സംബന്ധിച്ച വിഷയങ്ങള്
കേരളത്തിന് എയിംസ് സ്ഥാപിക്കണമെന്ന ആവശ്യം ഉന്നയിച്ചത്
“കേരളത്തിന് എയിംസ് വൈകാതെ ലഭിക്കുമെന്ന് നഡ്ഡ വീണ്ടും ഉറപ്പ് നല്കി. കൂടിക്കാഴ്ചയിലെ തീരുമാനങ്ങള് പോസിറ്റീവ് ആയിരുന്നു,” വീണാ ജോര്ജ് വ്യക്തമാക്കി.
