ചെന്നൈ: മൈചോങ് ചുഴലിക്കാറ്റിനെ തുടര്‍ന്നുണ്ടായ മഴയിലും വെള്ളപ്പൊക്കത്തിലും നാശനഷ്ടങ്ങള്‍ അനുഭവിച്ച കുടുംബങ്ങള്‍ക്കുള്ള 6,000 രൂപ ധനസഹായം ഞായറാഴ്ച തമിഴ്നാട് മുഖ്യമന്ത്രി എം കെ സ്റ്റാലിന്‍ ഉദ്ഘാടനം ചെയ്തു.
ചെന്നൈയിലെയും ചെങ്കല്‍പേട്ട, കാഞ്ചീപുരം, തിരുവള്ളൂര്‍ ജില്ലകളില്‍ ഉള്‍പ്പെടുന്ന സമീപ പ്രദേശങ്ങളിലെയും ജനങ്ങള്‍ക്കാണ് ഫണ്ട് ആദ്യം നല്‍കിയത്. വെള്ളപ്പൊക്ക ദുരിതാശ്വാസ വിതരണത്തിന്റെ തുടക്കം കുറിച്ചുകൊണ്ട് കനത്ത വെള്ളപ്പൊക്കത്തെത്തുടര്‍ന്ന് നാശനഷ്ടമുണ്ടായ പ്രദേശങ്ങളിലൊന്നായ വേളാച്ചേരിയിലെ വനിതാ കുടുംബനാഥന്മാര്‍ക്കാണ് സ്റ്റാലിന്‍ ഫണ്ട് ആദ്യം നല്‍കിയത്.
അധികാരപരിധിയിലുള്ള റേഷന്‍ കടകളില്‍ പണം വിതരണം ചെയ്യുന്ന തീയതിയും സമയവും വ്യക്തമാക്കുന്ന ടോക്കണുകളുടെ വിതരണം രണ്ട് ദിവസം മുമ്പാണ് ആരംഭിച്ചത്. ടോക്കണ്‍ ലഭിക്കാത്തവര്‍ക്ക് ധനസഹായം ലഭിക്കുന്നതിന് ന്യായവില കടകളില്‍ അപേക്ഷ സമര്‍പ്പിക്കാമെന്ന് സര്‍ക്കാര്‍ പത്രക്കുറിപ്പില്‍ അറിയിച്ചു.
