ന്യൂഡല്ഹി: കര്ഷകരുടെ ദില്ലി ചലോ പ്രതിഷേധം ഡല്ഹിയില് പ്രവേശിക്കുന്നത് തടയാന് ഡല്ഹി പൊലീസ് 30,000 ടിയര് ഗ്യാസ് ഷെല്ലുകള്ക്ക് ഓര്ഡര് നല്കിയതായി ഉദ്യോഗസ്ഥന് പറഞ്ഞു. പഞ്ചാബില് നിന്ന് മാര്ച്ച് ചെയ്ത നൂറുകണക്കിന് കര്ഷകരെ ഡല്ഹിയില് നിന്ന് 200 കിലോമീറ്റര് അകലെ അംബാലയ്ക്ക് സമീപം ഹരിയാനയുമായുള്ള സംസ്ഥാന അതിര്ത്തിയില് തടഞ്ഞു. ഹരിയാന സുരക്ഷാ സേന ഇവരെ പിരിച്ചുവിടാന് കണ്ണീര് വാതകം പ്രയോഗിച്ചു.
കര്ഷകരെ തടയാന് ഡല്ഹി പോലീസ് ഇതിനകം തന്നെ വന്തോതില് കണ്ണീര് വാതക ഷെല്ലുകള് കരുതിയിട്ടുണ്ട്. മധ്യപ്രദേശിലെ ഗ്വാളിയോറിലെ തേക്കന്പൂരില് സ്ഥിതി ചെയ്യുന്ന ബിഎസ്എഫിന്റെ ടിയര് സ്മോക്ക് യൂണിറ്റില് നിന്ന് 30,000 എണ്ണം കൂടി ഓര്ഡര് ചെയ്യുകയും ചെയ്തതായി ഒരു ഉദ്യോഗസ്ഥന് പറഞ്ഞു. പുതുതായി ഓര്ഡര് ചെയ്ത ഷെല്ലുകള് ഗ്വാളിയോറില് നിന്ന് ഡല്ഹിയിലേക്ക് കൊണ്ടുവരുന്നുണ്ടെന്നും അദ്ദേഹം പറഞ്ഞു.
ജനക്കൂട്ടത്തെ പിരിച്ചുവിടാന് സുരക്ഷാ സേന ഉപയോഗിക്കുന്ന കലാപ വിരുദ്ധ ഉപകരണമാണ് ടിയര് ഗ്യാസ് ഷെല്. സിംഗു (സോനിപത് വശം), തിക്രി (ബഹാദുര്ഗഡ് ഭാഗം), ഗാസിപൂര് (ഗാസിയാബാദ് വശം) എന്നീ അതിര്ത്തികളില് കര്ഷകരെ തടയാന് ഡല്ഹി പോലീസ് എല്ലാ സജ്ജീകരണങ്ങളും ഒരുക്കിയിട്ടുണ്ട്.
