തിരുവനന്തപുരം: എല്ലാ വിദ്യാര്ത്ഥികള്ക്കും സൗജന്യ ലാപ്ടോപ്പ് നല്കുമെന്ന അറിയിപ്പ് വ്യാജമെന്ന് വിദ്യാഭ്യാസ മന്ത്രി വി ശിവന്കുട്ടി. പൊതുവിദ്യാഭ്യാസ വകുപ്പിന്റെ പേരിലാണ് സന്ദേശം പ്രചരിക്കുന്നതെന്നും ഇതില് വഞ്ചിതരാകരുതെന്നും മന്ത്രി പറഞ്ഞു.
പൊതുവിദ്യാഭ്യാസ വകുപ്പിന്റെ പേരില് അപേക്ഷകരുടെ പേരു വിവരങ്ങള് അടക്കം ശേഖരിച്ചുകൊണ്ടാണ് സൈബര് തട്ടിപ്പ് നടത്തുന്നത്. ഇത് ശ്രദ്ധയില്പ്പെട്ടിട്ടുണ്ടെന്നും മന്ത്രി പറഞ്ഞു. സാധാരണ ജനങ്ങളിലേക്ക് വാട്സ് ആപ്പ് സന്ദേശം വഴിയാണ് ഈ ലിങ്ക് എത്തുന്നത്. പൊതുജനങ്ങള് തട്ടിപ്പിന് ഇരയാകുന്നത് തടയാന് അതിവേഗം നടപടികള് കൈക്കൊള്ളാന് പൊതുവിദ്യാഭ്യാസ വകുപ്പ് ഡിജിപിയ്ക്ക് പരാതി നല്കിയിട്ടുണ്ടെന്നും മന്ത്രി വ്യക്തമാക്കി.
