തമിഴ്നാട്: തിരുവള്ളൂര് കവരപ്പേട്ടയില് ട്രെയിനുകള് കൂട്ടിയിടിച്ചുണ്ടായ അപകടത്തില് 19 പേര്ക്ക് പരിക്ക്. പരിക്കേറ്റവരില് നാലു പേരുടെ നില ഗുരുതരമാണ്. ഇവരെ ചെന്നൈയിലെ സര്ക്കാര് മെഡിക്കല് കോളജിലേക്ക് മാറ്റി. മൈസൂരുവില് നിന്ന് ദര്ഭംഗയിലേക്ക് പോകുകയായിരുന്ന ബാഗ്മതി എക്സ്പ്രസ് ആണ് റെയില്വേ സ്റ്റേഷനോട് ചേര്ന്നു നിര്ത്തിയിട്ട ചരക്ക് ട്രെയിനില് ഇടിച്ച് അപകടമുണ്ടായത്.
ആകെ 1360 യാത്രക്കാരാണ് ട്രെയിനില് ഉണ്ടായിരുന്നത്. അപകടത്തെ തുടര്ന്ന് രണ്ട് ട്രെയിനുകള് റദ്ദക്കി. 16 ട്രെയിനുകള് വഴി തിരിച്ചു വിട്ടു. കൂട്ടിയിടിയുടെ ആഘാതത്തില് 13 കോച്ചുകള് പാളം തെറ്റി. മൂന്ന് കോച്ചുകള്ക്ക് തീപിടിക്കുകയും ചെയ്തു. ഇന്ന് ഉച്ചയോടെ ഈ റൂട്ടിലെ സര്വീസുകള് സാധാരണ നിലയിലാകുമെന്ന് അപകടസ്ഥലം സന്ദര്ശിച്ച ദക്ഷിണ റെയില്വേ ജനറല് മാനേജര് ആര് എന് സിംഗ് പറഞ്ഞു. അപകടത്തില് ഉന്നതതല അന്വേഷണവും റെയില്വേ പ്രഖ്യാപിച്ചിട്ടുണ്ട്.
