കൊച്ചി: സിറോ മലബാര് സഭയുടെ നാലാമത് മേജര് ആര്ച്ച് ബിഷപ്പായി മാര് റാഫേല് തട്ടില് ഇന്ന്
ചുമതലയേറ്റു. കാക്കനാട് മൗണ്ട് സെന്റ് തോമസിലാണ് സ്ഥാനാരോഹണ ചടങ്ങുകള് നടന്നത്. 1989 ല് മാര് ജോസഫ് കുണ്ടുകുളത്തില് നിന്ന് പൗരോഹിത്യം സ്വീകരിച്ച മാര് റാഫേല് തട്ടില് 2010ലാണ് തൃശ്ശൂര് സഹായ മെത്രാനാകുന്നത്. കര്ദിനാള് മാര് ജോര്ജ് ആലഞ്ചേരി സ്ഥാനമൊഴിഞ്ഞതിനെത്തുടര്ന്നാണു പുതിയ മേജര് ആര്ച്ച് ബിഷപ്പിനെ തിരഞ്ഞെടുത്തത്. നിലവില് ഷംഷാബാദ് രൂപയുടെ ബിഷപ്പ് ആയി സേവനം അനുഷ്ഠിക്കുകയായിരുന്നു ഇദ്ദേഹം.
കുര്ബാന തര്ക്കം ഉള്പ്പെടെയുള്ള വിഷയങ്ങളില് പരിഹാരം കാണലാണ് തന്റെ ലക്ഷ്യമെന്നും ചര്ച്ചകള്ക്കുള്ള സാധ്യതകള് അടഞ്ഞിട്ടില്ലെന്നും റാഫേല് തട്ടില് പ്രതികരിച്ചിരുന്നു. തങ്ങളെ കേള്ക്കുന്ന നേതൃത്വത്തിനായാണ് കാത്തിരുന്നതെന്നും മാര് റാഫേല് തട്ടിലിന്റെ വാക്കുകളില് പ്രതീക്ഷയുണ്ടെന്നും വിമത വിഭാഗവും പ്രതികരിച്ചിരുന്നു.
രഹസ്യ ബാലറ്റിലൂടെ നടത്തിയ വോട്ടെടുപ്പിനൊടുവില് പുതിയ മേജര് ആര്ച്ച് ബിഷപ്പിന്റെ പേര് വത്തിക്കാന്റെ അനുമതിക്കായി സമര്പ്പിച്ചിരുന്നു. വത്തിക്കാന്റെ അനുമതി ലഭിച്ചതിനെ തുടര്ന്നാണ് ഔദ്യോഗിക പ്രഖ്യാപനം നടന്നത്.
