ഈ വര്ഷത്തെ ആറ്റുകാല് പൊങ്കാല മഹോത്സവത്തിനുള്ള തയാറെടുപ്പുകളും ക്രമീകരണങ്ങളും സമയബന്ധിതമായി പൂര്ത്തിയാക്കുന്നതിനായി മന്ത്രി വി. ശിവന്കുട്ടിയുടെ അധ്യക്ഷതയില് ആറ്റുകാല് ഭഗവതി ക്ഷേത്ര ട്രസ്റ്റ് ഹാളില് അവലോകന യോഗം ചേര്ന്നു. പൊങ്കാല മഹോത്സവത്തിനോടനുബന്ധിച്ച് നടത്തേണ്ട ക്രമീകരണങ്ങളെക്കുറിച്ച് വിവിധ സര്ക്കാര് വകുപ്പുകള്ക്ക് മന്ത്രി നിര്ദേശം നല്കി.
ഫെബ്രുവരി 17 മുതല് 26 വരെയാണ് ആറ്റുകാല് പൊങ്കാല മഹോത്സവം. ഫെബ്രുവരി 25നാണ് ചരിത്രപ്രസിദ്ധമായ ആറ്റുകാല് പൊങ്കാല. പൂര്ണമായും ഗ്രീന്പ്രോട്ടോകോള് പാലിച്ചായിരിക്കും പൊങ്കാല മഹോത്സവം നടത്തുക. ഉത്സവ മേഖലകളിലെ റോഡുകളുടെയും തെരുവ് വിളക്കുകളുടെയും അറ്റകുറ്റപ്പണികള് അടിയന്തരമായി പൂര്ത്തിയാക്കുന്നതിന് തിരുവനന്തപുരം നഗരസഭയ്ക്കും പൊതുമരാമത്ത് റോഡുകള് വിഭാഗത്തിനും കെഎസ്ഇബിക്കും മന്ത്രി നിര്ദേശം നല്കി.
തെരുവ് നായ ശല്യം പരിഹരിക്കണം. മൊബൈല് ടോയ്ലെറ്റുകള്, വാട്ടര്ടാങ്കുകള് എന്നിവയ്ക്കുള്ള ക്രമീകരണങ്ങള് ഒരുക്കണമെന്നും മന്ത്രി പറഞ്ഞു. ഡ്രെയിനേജുകളും ഓടകളും വൃത്തിയാക്കുന്നതിനും ഭക്ഷ്യസുരക്ഷ വിഭാഗത്തിന്റെയും എക്സൈസിന്റെയും പരിശോധനകള് കര്ശനമാക്കുന്നതിന് ഉദ്യോഗസ്ഥര്ക്ക് നിര്ദേശം നല്കി. ദുരന്തനിവാരണവിഭാഗം എല്ലാ വിധത്തിലും സജ്ജമായിരിക്കണമെന്നും മന്ത്രി അറിയിച്ചു.ഉത്സവദിവസങ്ങളില് കെഎസ്ആര്ടിസി പ്രത്യേക സര്വീസുകള് നടത്തും. കടകളില് ഭക്ഷ്യസുരക്ഷാ വിഭാഗത്തിന്റെ പരിശോധനകള് അടുത്തയാഴ്ച മുതല് ആരംഭിക്കും.
