കൊച്ചി: നിയമസഹായം തേടിയെത്തിയ യുവതിയെ പീഡിപ്പിച്ച കേസില് പ്രതിയായ മുന് സര്ക്കാര് പ്ലീഡര് പിജി മനു പൊലീസില് കീഴടങ്ങി. എറണാകുളം പുത്തന്കുരിശ് പൊലീസ് മുമ്പാകെയാണ് ഇന്ന് രാവിലെ 8 മണിയോടെ മനു കീഴടങ്ങിയത്. മനുവിന്റെ മുന്കൂര് ജാമ്യാപേക്ഷ സുപ്രീംകോടതി തള്ളിയിരുന്നു.
കേസില് പത്തു ദിവസത്തിനുള്ളില് കീഴടങ്ങാനാണ് കോടതി നിര്ദേശിച്ചിരുന്നത്. കീഴടങ്ങുന്ന ദിവസം തന്നെ മജിസ്ട്രേറ്റിന്റെ മുന്നില് ഹാജരാക്കി അതേ ദിവസം തന്നെ ജാമ്യപേക്ഷ പരിഗണിക്കാനും കോടതി നിര്ദ്ദേശിച്ചു. മുന്കൂര് ജാമ്യാപേക്ഷ തള്ളിയ ഹൈക്കോടതി ഉത്തരവിനെതിരെയാണ് പിജി മനു സുപ്രീംകോടതിയെ സമീപിച്ചത്.
ബലാത്സംഗം, ഐടി ആക്ട് അടക്കമുള്ള വകുപ്പുകള് ചുമത്തിയാണ് പി ജി മനുവിനെതിരെ കേസെടുത്തിരിക്കുന്നത്. അതേ സമയം, തന്റെ ഭാഗം കേള്ക്കാതെ തീരുമാനം എടുക്കരുതെന്ന് ആവശ്യപ്പെട്ടു കൊണ്ട് അതിജീവിതയും സുപ്രീം കോടതിയില് തടസ്സഹര്ജി നല്കിയിരുന്നു. പെണ്കുട്ടിയെ പരിശോധിച്ച ഡോക്ടറുടെ റിപ്പോര്ട്ട് പരിശോധിച്ച കോടതി പ്രതി ഗുരുതര കുറ്റകൃത്യമാണ് നടത്തിയതെന്ന് ചൂണ്ടിക്കാട്ടിയാണ് മുന്കൂര് ജാമ്യാപേക്ഷ ഹൈക്കോടതി തള്ളിയത്.
