തിരുവനന്തപുരം: സംസ്ഥാനത്തെ ആശാ വര്ക്കര്മാരുടെ പ്രതിമാസ ഓണറേറിയത്തില് വര്ദ്ധനവ്. 1000 രൂപ വര്ധിപ്പിച്ച് 7,000 രൂപയാക്കി ആരോഗ്യ വകുപ്പ് ഉത്തരവിട്ടു. 2023 ഡിസംബര് മാസം മുതല് പ്രാബല്യത്തില് വരത്തക്കവിധത്തിലാണ് ഓണറേറിയം വര്ധിപ്പിച്ചതെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു.
2016ന് മുമ്പ് ആശാ വര്ക്കര്മാരുടെ പ്രതിമാസ ഓണറേറിയം 1,000 രൂപ ആയിരുന്നു. പിന്നീട് ഘട്ടംഘട്ടമായാണ് പ്രതിമാസ ഓണറേറിയം 6,000 രൂപ വരെ വര്ധിപ്പിച്ചത്. ഇതിന്റെ തുടര്ച്ചയായാണ് വീണ്ടും 1,000 രൂപ ഓണറേറിയം വര്ധിപ്പിച്ചത്.
നിലവില് 14 ജില്ലകളിലായി 21,371 പേര് ഗ്രാമ പ്രദേശങ്ങളിലും 4,205 പേര് നഗര പ്രദേശങ്ങളിലും 549 പേര് ട്രൈബല് മേഖലയിലുമായി ആകെ 26,125 ആശാ വര്ക്കര്മാര് സേവനമനുഷ്ഠിക്കുന്നു. സംസ്ഥാന സര്ക്കാര് മാസം തോറും നല്കുന്ന 7000 രൂപ ഓണറേറിയത്തിന് പുറമേ വിവിധ പദ്ധതികളില് നിന്നുള്ള ഇന്സെന്റീവുകളും ലഭിക്കും. ഈ വര്ധനവിന്റെ ഗുണഫലം ഇവര്ക്കെല്ലാം ലഭിക്കുമെന്നും മന്ത്രി വ്യക്തമാക്കി.
