കേരളത്തില് ചൂട് കൂടുന്നു. ചൂട് വര്ധിക്കുന്നത് കാരണം പൊതുജനങ്ങള്ക്കായി ആരോഗ്യ വകുപ്പ് ജാഗ്രതാ നിര്ദേശങ്ങള് പുറപ്പെടുവിച്ചു. താപനില ഉയര്ന്നതിനാല് നിര്ജലീകരണവും ദേഹാസ്വാസ്ഥ്യവും ഉണ്ടാകാന് സാധ്യതയുള്ളതിനാല് ദാഹം തോന്നിയില്ലെങ്കിലും ധാരാളം വെള്ളം കുടിക്കണമെന്നാണ് മുന്നറിയിപ്പ്.
പുറത്ത് ഇറങ്ങുമ്പോള് സൂര്യതാപമേല്ക്കാനുള്ള സാധ്യതയുള്ളതിനാല് നേരിട്ട് വെയില് ഏല്ക്കാതിരിക്കാന് ശ്രദ്ധിക്കണം. വെയിലത്ത് ജോലി ചെയ്യേണ്ടി വരുന്ന അവസരങ്ങളില് പകല് 11 മണി മുതല് 3 മണിവരെയുള്ള സമയം വിശ്രമവേളയായി പരിഗണിച്ച് ജോലി സമയം ക്രമീകരിക്കുക. പുറത്ത് പോകുമ്പോള് കുട കയ്യില് സൂക്ഷിക്കുക. മുഴുവനായിട്ട് കവര് ചെയ്യുന്ന വസ്ത്രങ്ങള് ധരിക്കുക.
സൂര്യാതപവുമായി ബന്ധപ്പെട്ട ആരോഗ്യ പ്രശ്നങ്ങള് യഥാസമയം കണ്ടെത്തി ശരിയായ ചികിത്സ ഉറപ്പുവരുത്തുന്നതിനായി എല്ലാ പി.എച്ച്.സി/സി.എച്ച്.സി മെഡിക്കല് ഓഫീസര്മാര്ക്കും, താലൂക്ക്/ജില്ലാ/ജനറല് ആശുപത്രി/മെഡിക്കല് കോളേജ് സൂപ്രണ്ടുമാര്ക്കും അടിയന്തിര നിര്ദേശം നല്കിയിട്ടുണ്ടെന്നും മന്ത്രി വ്യക്തമാക്കി.
