തിരുവനന്തപുരം: സംസ്ഥാനത്ത് പരീക്ഷകള് കഴിയുന്നതിനു മുമ്പ് തന്നെ അടുത്ത അധ്യയന വര്ഷത്തേക്കുളള പാഠപുസ്തക വിതരണം ആരംഭിച്ചതായി വിദ്യാഭ്യാസമന്ത്രി വി ശിവന്കുട്ടി. 2,4,6,8,10 ക്ലാസുകളിലെ പാഠപുസ്തക വിതരണമാണ് തുടങ്ങിയതെന്ന് മന്ത്രി പറഞ്ഞു. 1,3,5,7,9 ക്ലാസുകളിലെ പുതുക്കിയ പാഠപുസ്തങ്ങള് മേയ് ആദ്യം വിതരണം ചെയ്യുമെന്നും മന്ത്രി പറഞ്ഞു. തിരുവനന്തപുരം ഗവണ്മെന്റ് എച്ച്എസ്എസ് കോട്ടണ്ഹില്ലില്പാഠപുസ്തക വിതരണത്തിന്റെ സംസ്ഥാനതല ഉദ്ഘാടനം നിര്വഹിക്കുകയായിരുന്നു അദ്ദേഹം.
അധ്യയനവര്ഷം തുടങ്ങി മാസങ്ങള് കഴിഞ്ഞാലും ചില വര്ഷങ്ങളില് പുസ്തകങ്ങള് ലഭിക്കാറില്ല. സംസ്ഥാനത്ത് ആദ്യമായാണ് അധ്യയനവര്ഷം അവസാനിക്കും മുന്പ് അടുത്ത അധ്യയന വര്ഷത്തെ പാഠപുസ്തകങ്ങള് പുറത്തിറക്കുന്നത്. അവധിക്കാലത്ത് കുട്ടികള്ക്ക് അടുത്ത ക്ലാസിലെ പാഠ ഭാഗങ്ങള് പരിചപ്പെടുത്തുന്നതിനു വേണ്ടിയും പത്താം ക്ലാസിലേക്ക് പ്രവേശിക്കുന്ന കുട്ടികള്ക്ക് തയ്യാറെടുപ്പ് നടത്തുന്നതിനു വേണ്ടിയുമാണ് പുസ്തക വിതരണം നേരത്തെ ആക്കിയതെന്നും മന്ത്രി കൂട്ടിച്ചേര്ത്തു.
