തിരുവനന്തപുരം: ഐക്യകേരളത്തിന് ഇന്ന് അറുപത്തിയേഴാം പിറന്നാള്. കേരളസംസ്ഥാനം രൂപീകരിച്ച നവംബര് ഒന്നാണ് കേരളപ്പിറവി എന്നറിയപ്പെടുന്നത്. കേരളപ്പിറവി ആഘോഷത്തിന്റെ ഭാഗാമായി സംസ്ഥാന സര്ക്കാരിന്റെ കേരളീയം ആഘോഷങ്ങള്ക്ക് ഇന്ന് തുടക്കമാകും. കേരളീയം ആഘോഷമാക്കാന് അനന്തപുരിയില് പുലികളിയും അശ്വാരൂഢസേനാ അഭ്യാസപ്രകടനത്തിന് മുന്നോടിയായി കുതിരകളുമായുള്ള റോഡ് ഷോയും ഇന്നലെ വൈകിട്ട് അരങ്ങേറിയിരുന്നു.
തലസ്ഥാനത്ത് 41 വേദികളിലായി 7 ദിവസം നീളുന്ന ആഘോഷ പരിപാടിയാണ് നടക്കുന്നത്. ഇന്ന് നടക്കുന്ന ഉദ്ഘാടന ചടങ്ങില് കമലഹാസനും മമ്മൂട്ടിയും മോഹന്ലാലും അടക്കം വന് താരനിരയാണ് പങ്കെടുക്കുന്നത്. കേരളീയത്തിന് തിരിതെളിയുന്നതോടെ ഇനിയുള്ള ഏഴ് ദിനം തലസ്ഥാനത്താകെ ഉത്സവമയമായിരിക്കും. കേരളം ഇതുവരെ കൈവരിച്ച നേട്ടങ്ങള്, ഭാവി കേരളത്തെ കുറിച്ചുള്ള സ്വപ്നങ്ങള് തുടങ്ങിയ എല്ലാം ഒരു കുടക്കീഴില് അവതരിപ്പിക്കുന്നതാണ് കേരളീയം. കേരളീയം ആഘോഷത്തിന്റെ ഭാഗമായി ദീപാലങ്കാരങ്ങളാല് നിറഞ്ഞിരിക്കുകയാണ് തലസ്ഥാനനഗരി.
1947ല് ഇന്ത്യ ബ്രിട്ടീഷുകാരില് നിന്നും സ്വതന്ത്രമായ ശേഷം, ഐക്യകേരളത്തിനുവേണ്ടിയുള്ള പ്രക്ഷോഭങ്ങള് ശക്തിപ്പെട്ടു. 1956 – ലെ സംസ്ഥാന പുനഃസംഘടന നിയമമാണ് ഈ പുനര്സംഘടനക്കും പല സംസ്ഥാന രൂപീകരണങ്ങള്ക്കും വിഭജനത്തിനു ആധാരം. ഭാഷാടിസ്ഥാനത്തില് സംസ്ഥാനങ്ങളെ പുനര്സംഘടിപ്പിക്കാനുള്ള ഇന്ത്യാഗവണ്മെന്റിന്റെ തീരുമാനപ്രകാരം തിരുവിതാംകൂര്, കൊച്ചി രാജ്യങ്ങള് മദ്രാസ് പ്രസിഡന്സിയുടെ മലബാര് പ്രദേശങ്ങള് ഇങ്ങനെ മലയാളം പ്രധാനഭാഷയായ പ്രദേശങ്ങളെല്ലാം കൂട്ടിച്ചേര്ത്തുകൊണ്ട് 1956 നവംബര് ഒന്നിന് കേരളം എന്ന സംസ്ഥാനം രൂപവത്കരിച്ചു. ഇതിന്റെ അടിസ്ഥാനത്തില് നവംബര് ഒന്ന് കേരളപ്പിറവിദിനമായി ആഘോഷിക്കപ്പെടുന്നു.
