തിരുവനന്തപുരം: ആര്എല്വി രാമകൃഷ്ണനെ നിറത്തിന്റെ പേരില് അധിക്ഷേപിച്ച സംഭവത്തില് പ്രതികരണവുമായി മന്ത്രി എം ബി രാജേഷ്. നിറത്തിന്റെ പേരില് മനുഷ്യരെ ഇകഴ്ത്തുന്നതും അധിക്ഷേപിക്കുന്നതും ഇക്കാലത്തെ ഏറ്റവും വലിയ അശ്ലീലങ്ങളിലൊന്നാണെന്ന് മന്ത്രി എം ബി രാജേഷ് പറഞ്ഞു. ആ അശ്ലീലത്തിന്റെ പിന്നിലുള്ളത് വംശീയ മനോഭാവമാണെന്നും ഈ മനുഷ്യത്വ വിരുദ്ധതക്കെതിരെ അതിശക്തമായ പ്രതിഷേധം ഉയരണമെന്നും എം ബി രാജേഷ് അഭിപ്രായപ്പെട്ടു. നര്ത്തകി സത്യഭാമയുടെ അധിക്ഷേപ പരാമര്ശവുമായി ബന്ധപ്പെട്ട വിവാദത്തിലാണ് മന്ത്രിയുടെ പ്രതികരണം.
‘നിറത്തിന്റെ പേരില് മനുഷ്യരെ ഇകഴ്ത്തുന്നതും അധിക്ഷേപിക്കുന്നതും ഇക്കാലത്തെ ഏറ്റവും വലിയ അശ്ലീലങ്ങളിലൊന്നാണ്. ആ അശ്ലീലത്തിന്റെ പിന്നിലുള്ളത് വംശീയമായ മനോഭാവമാണ്. മനംപിരട്ടലുളവാക്കുന്ന വംശീയതയുടെ വെളിപ്പെടലാണ് കലാമണ്ഡലത്തിന്റെ പേരില് അറിയപ്പെടുന്ന ഒരാളുടെ ഭാഗത്തു നിന്ന് ഉണ്ടായിട്ടുള്ളത്. മഹാകവി വള്ളത്തോള് സ്ഥാപിച്ച കലാമണ്ഡലത്തിനു തന്നെ അതപമാനമാണ് എന്നതു കൊണ്ട് ആ സ്ഥാപനം അത് തള്ളിപ്പറഞ്ഞു കഴിഞ്ഞു. അത് എത്രയും ഉചിതമായി. കേരള സമൂഹത്തില് ആധുനിക ജനാധിപത്യ മൂല്യങ്ങള്ക്കു നേരെ ഉണ്ടാവുന്ന വലതു പക്ഷ അധിനിവേശത്തിന്റെ പ്രകടനം കൂടിയാണ് ഇത്തരം പരാമര്ശങ്ങള്. നിറം , ശാരീരികമായ പ്രത്യേകതകള്, ചെയ്യുന്ന തൊഴില്, ജാതി, മതം, ലിംഗപദവി എന്നിവയുടെയെല്ലാം പേരില് മനുഷ്യരെ അധിക്ഷേപിക്കുന്നത് അങ്ങേയറ്റം മനുഷ്യത്വ വിരുദ്ധമാണ്. അതിനെതിരായി അതിശക്തമായ പ്രതിഷേധമുയരണം. അധിക്ഷേപത്തിനിരയായ ആര്.എല്.വി രാമകൃഷ്ണന് എന്റെ ഐക്യദാര്ഢ്യം’ എന്നാണ് മന്ത്രി എം ബി രാജേഷ് പ്രതികരിച്ചത്.
