തിരുവനന്തപുരം: വിവാദ മാസപ്പടി കേസില് അന്വേഷണം ആവശ്യപ്പെട്ട് കോണ്ഗ്രസ് നേതാവ് മാത്യു കുഴല്നാടന് എംഎല്എ സമര്പ്പിച്ച ഹര്ജി കോടതി തള്ളി. മുഖ്യമന്ത്രി പിണറായി വിജയനും മകള് വീണയ്ക്കും എതിരായ ഹര്ജി തിരുവനന്തപുരം വിജിലന്സ് കോടതിയാണ് തള്ളിയത്. മുഖ്യമന്ത്രിയുടെ മകള് വീണ വിജയന് മാസപ്പടിയായി പണം നല്കിയെന്ന ആരോപണം ഉയര്ന്ന കേസില് സിഎംആര്എല് കമ്പനിക്ക് സംസ്ഥാന സര്ക്കാര് വഴിവിട്ട സഹായങ്ങള് നല്കിയെന്നായിരുന്നു മാത്യു കുഴല്നാടന്റെ ആരോപണം. എന്നാല് തെളിവില്ലെന്ന് കണ്ടെത്തിയാണ് വിജിലന്സ് കോടതി ഈ ആവശ്യം നിരാകരിച്ചത്. വിജിലന്സ് അന്വേഷണം വേണമെന്ന ആവശ്യവും കോടതി മേല്നോട്ടത്തില് അന്വേഷണം വേണമെന്ന ആവശ്യവും തള്ളി.
സ്വകാര്യ കമ്പനിക്ക് വഴിവിട്ട സഹായം നല്കിയെന്നതിന് തെളിവുകള് ഹാജരാക്കാന് കോടതി മാത്യു കുഴല്നാടനോട് ആവശ്യപ്പെട്ടിരുന്നു. കഴിഞ്ഞ ദിവസം കേസ് പരിഗണിച്ചപ്പോള് അഞ്ച് രേഖകള് മാത്യു കുഴല്നാടന് കോടതിയില് നല്കി. എന്നാല് ഈ രേഖകളിലൊന്നും സര്ക്കാര് വഴിവിട്ട് സഹായം ചെയ്തതായി കണ്ടെത്താനായിട്ടില്ലെന്ന് വിജിലന്സും കോടതിയില് വാദിച്ചു. മുഖ്യമന്ത്രിയുടെയും മകളുടെയും പങ്ക് തെളിയിക്കുന്ന രേഖകളാണ് ഇതെന്നായിരുന്നു മാത്യു കുഴല്നാടന്റെ വാദം. സിഎംആര്എല്ലിന് വഴിവിട്ട സഹായം നല്കാന് മുഖ്യമന്ത്രി ഇടപെട്ടുവെന്നതിനു പര്യാപ്തമായ രേഖകളാണ് ഹാജരാക്കിയതെന്നും കുഴല്നാടന് അവകാശപ്പെട്ടിരുന്നു. കഴിഞ്ഞ ദിവസം കേസ് പരിഗണിച്ചപ്പോള് കുഴല്നാടന്റെ അഭിഭാഷകന് രേഖകള് കോടതിക്ക് കൈമാറുകയായിരുന്നു.
