തിരുവനന്തപുരം: അടുത്ത അധ്യയനവര്ഷത്തെ പ്രവേശനോത്സവത്തിന്റെ സംസ്ഥാന തല ഉദ്ഘാടനം എറണാകുളത്ത് ജൂണ് മൂന്നിന് നടക്കും. എറണാകുളം ഗവ. ഗേള്സ് സ്കൂളില് മുഖ്യമന്ത്രി പിണറായി വിജയന് സംസ്ഥാന തല പ്രവേശനോത്സവം ഉദ്ഘാടനം ചെയ്യും. ഈ മാസം 28ന് തിരുവനന്തപുരത്ത് വിദ്യാഭ്യാസ കോണ്ക്ലേവ് നടത്തും. എസ്എസ്എസ്എല്സി പരീക്ഷ നിലവാരം ഉയര്ത്തുന്നത് സംബന്ധിച്ച് കോണ്ക്ലേവ് ചര്ച്ച നടത്തും. നിയമന അംഗീകാരം ലഭിക്കാത്ത അധ്യാപകര്ക്കും പരിശീലനത്തില് പങ്കെടുക്കാമെന്നും വിദ്യാഭ്യാസ വകുപ്പ് അറിയിച്ചു.
അടുത്ത അധ്യയന വര്ഷം സ്കൂള് തുറക്കുന്നതുമായി ബന്ധപ്പെട്ട മുന്നൊരുക്ക പ്രവര്ത്തനങ്ങള് സമയബന്ധിതമായി പൂര്ത്തീകരിക്കണമെന്ന് നേരത്തെ മുഖ്യമന്ത്രി നിര്ദേശം നല്കിയിരുന്നു. പ്രവേശനോത്സവത്തിന് മുന്നോടിയായി സ്കൂളുകളുടെ സുരക്ഷ ഉറപ്പാക്കണമെന്നും അറ്റകുറ്റ പണികള് നടത്തണമെന്നും കഴിഞ്ഞ ദിവസം ചേര്ന്ന അവലോകന യോഗത്തില് മുഖ്യമന്ത്രി നിര്ദേശിച്ചിരുന്നു.
സ്കൂളിന്റെ സുരക്ഷ ഉറപ്പാക്കണം. അറ്റകുറ്റ പണികള് നടത്തണം. സ്കൂളും പരിസരവും വൃത്തിയാക്കണം. ശുദ്ധമായ കുടിവെള്ളം ഉറപ്പാക്കണം.. ഉപയോഗശൂന്യമായ ഫര്ണിച്ചര്, മറ്റ് ഉപകരണങ്ങള് എന്നിവ നീക്കം ചെയ്യുകയോ പ്രത്യേക മുറിയില് സൂക്ഷിക്കുകയോ വേണം. സ്കൂള് പരിസരത്തെ അപകടാവസ്ഥയിലുള്ള മരങ്ങള്, ബോര്ഡുകള്, ഹോര്ഡിംഗ്സ് എന്നിവ മാറ്റണം. സ്കൂളിലേയ്ക്കുളള വഴി, പരിസരം എന്നിവിടങ്ങളിലെ അപകടാവസ്ഥയില് നില്ക്കുന്ന വൈദ്യുത പോസ്റ്റുകള്, വൈദ്യുത കമ്പികള് എന്നിവ ഒഴിവാക്കാന് പ്രത്യേക നടപടികള് സ്വീകരിക്കും.
സ്കൂള് പരിസരത്ത് ലഹരി പദാര്ത്ഥങ്ങളുടെ ഉപയോഗവും വില്പ്പനയും നടക്കുന്നില്ലെന്ന് ഉറപ്പാക്കണം. ഗോത്ര വിദ്യാര്ത്ഥികള്ക്ക് ഗോത്ര ഭാഷയില് വിദ്യാഭ്യാസം ചെയ്യാന് അവസരം നല്കുന്നതിനും പിന്തുണ ഉറപ്പാക്കുന്നതിനും നിയമിച്ച മെന്റര് ടീച്ചര്മാര് സ്കൂള് തുറക്കുന്ന ദിവസം തന്നെ എത്തുമെന്ന് ഉറപ്പാക്കും. ശുചിത്വ വിദ്യാലയം ഹരിത വിദ്യാലയം ക്യാംപെയ്ന് നടത്തണം. വസ്ത്രം, പുസ്തകം, ഉച്ചഭക്ഷണം ഉറപ്പാക്കണം. ബോധവല്ക്കണ, എന്ഫോഴ്സ്മെന്റ് നടപടികള് ശക്തമാക്കും. പരിഷ്കരിച്ച പാഠപുസ്തകങ്ങളില് ലഹരി ഉപയോഗം മൂലം ഉണ്ടാകുന്ന ഭവിഷ്യത്തുകള് പ്രതിപാദിച്ചിട്ടുണ്ട്. വിദ്യാഭ്യാസ സ്ഥാപനങ്ങളെ ലഹരി മുക്തമാക്കാന് കുട്ടികള്, രക്ഷകര്ത്താക്കള്, അധ്യാപകര് എന്നിവരുടെ സഹകരണം ഉറപ്പാക്കണം. രക്ഷകര്ത്താകളെ പങ്കെടുപ്പിച്ച് ലഹരി വിരുദ്ധ ബോധവല്ക്കണ ക്ലാസ് സംഘടിപ്പിക്കും.
ജൂണ് 26ന് ആന്റി നാര്ക്കോട്ടിക് ദിനത്തില് കുട്ടികളുടെ പാര്ലമെന്റ് നടത്തും. ഒക്ടോബര് 2ന് കുട്ടികളുടെ താമസസ്ഥലങ്ങളില് ജനങ്ങളെ കൂടി പങ്കെടുപ്പിച്ച് സംവാദ സദസ് നടത്തും. നവംബര് 14ന് പ്രത്യേക ശിശുദിന അസംബ്ലി ചേരും. ഡിസംബര് 10ന് ലഹരി വിരുദ്ധ സെമിനാര് നടത്തും. 2025 ജനുവരി 30ന് ക്ലാസ് സഭകള് ചേര്ന്ന് ഈ വര്ഷത്തെ പ്രവര്ത്തനങ്ങളുടെ അവലോകനവും നടത്തും. തെളിവാനം വരയ്ക്കുന്നവര് എന്ന കൈപുസ്തകത്തെ ആസ്പദമാക്കി തയ്യാറാക്കിയ പ്രവര്ത്തനങ്ങള് സമയബന്ധിതമായി പൂര്ത്തിയാക്കണം. എല്ലാ സര്ക്കാര്, അര്ദ്ധ സര്ക്കാര്, പൊതുമേഖല, സഹകരണ സ്ഥാപനങ്ങളിലും കാലതാമസമില്ലാതെ ലഹരി വിരുദ്ധ പോസ്റ്റര് പതിക്കണം.
