തിരുവനന്തപുരം: സംസ്ഥാനത്ത് ഇന്നും അതിതീവ്ര മഴ മുന്നറിയിപ്പ്. പത്തനംതിട്ട, കോട്ടയം, ഇടുക്കി ജില്ലകളില് റെഡ് അലേര്ട്ട് പ്രഖ്യാപിച്ചിട്ടുണ്ട്. അഞ്ച് ജില്ലകളില് ഓറഞ്ച് അലേര്ട്ടും ആറ് ജില്ലകളില് യെല്ലോ അലര്ട്ടും പ്രഖ്യാപിച്ചു. വിനോദ സഞ്ചാര കേന്ദ്രങ്ങളിലും മലയോരമേഖലയിലും യാത്രാ വിലക്ക് തുടരുകയാണ്.
തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂര് ജില്ലകളിലാണ് ഓറഞ്ച് അലേര്ട്ടുള്ളത്. പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് യെല്ലോ അലേര്ട്ടാണ്. തെക്കന് തമിഴ്നാട് തീരത്തും വടക്കന് കേരളത്തിന് സമീപവും നിലനില്കുന്ന ചക്രവാത ചുഴികളാണ് മഴയ്ക്ക് കാരണം. ബുധനാഴ്ച്ച ബംഗാള് ഉള്ക്കടലില് ന്യൂനമര്ദ്ദം രൂപപ്പെടാനും പിന്നീടത് ചുഴലിക്കാറ്റായി മാറാനും സാധ്യത ഉണ്ടെന്നും കേന്ദ്രകാലവസ്ഥ വകുപ്പ് അറിയിച്ചു.
