കോഴിക്കോട്: കോഴിക്കോട് മെഡിക്കല് കോളേജിലെ ചികിത്സാ പിഴവ് അന്വേഷിക്കാന് മെഡിക്കല് ബോര്ഡ് രൂപീകരിച്ചു. അടുത്ത മാസം ഒന്നിന് ബോര്ഡ് യോഗം ചേര്ന്ന് കേസ് പരിശോധിക്കും. നാല് വയസ്സുകാരിയുടെ കൈവിരലിനു പകരം നാവിന് ശസ്ത്രക്രിയ ചെയ്ത സംഭവത്തിലാണ് അന്വേഷണം.
മെഡിക്കല് നെഗ്ളിജന്സ് ആക്ട് പ്രകാരം കോഴിക്കോട് മെഡിക്കല് കോളേജ് പൊലീസ് രജിസ്റ്റര് ചെയ്ത കേസിലാണ് ജില്ലാ മെഡിക്കല് ഓഫീസര് വിദഗ്ദരെ ഉള്പ്പെടുത്തി മെഡിക്കല് ബോര്ഡ് രൂപീകരിച്ചത്. അവയവം മാറി ശസ്ത്രക്രിയയ്ക്ക് വിധേയമായ കുട്ടിയുടെ ചികില്സയുമായി ബന്ധപ്പെട്ട രേഖകള്, ഡ്യൂട്ടി രജിസ്റ്റര്, ശസ്ത്രക്രിയ നടത്തിയ ഡോക്ടര്, ഡ്യൂട്ടിയില് ഉണ്ടായിരുന്നവര് എന്നിവര് പൊലീസിന് നല്കിയ മൊഴി, തുടങ്ങിയവ അടുത്ത മാസം ഒന്നിന് ചേരുന്ന മെഡിക്കല് ബോര്ഡ് യോഗം പരിശോധിക്കും.
