കോഴിക്കോട്: ചലച്ചിത്ര പ്രവര്ത്തകനും എഴുത്തുകാരനുമായ ചെലവൂര് വേണു അന്തരിച്ചു. കേരളത്തിലെ സമാന്തര ചലച്ചിത്ര രംഗത്ത് ഏറെ ശ്രദ്ധേയനായ വ്യക്തിയായിരുന്നു ചെലവൂര് വേണു. ചലച്ചിത്ര നിരൂപകനായാണ് സിനിമ രംഗത്തേക്കു കടന്നുവരുന്നത്. എട്ടാം ക്ലാസ്സില് പഠിക്കുമ്പോള് ‘ഉമ്മ’ എന്ന സിനിമയ്ക്ക് നിരൂപണമെഴുതി. അന്ന് അത് ചന്ദ്രിക വാരികയില് പ്രസിദ്ധീകരിച്ചിരുന്നു. ലോക സിനിമയെ മലയാളികള്ക്ക് മുന്നില് പരിചയപ്പെടുത്തിയ ഫിലിം സൊസൈറ്റി പ്രസ്ഥാനങ്ങളുടെ പ്രവര്ത്തനങ്ങളിലൂടെയാണ് ചെലവൂര് വേണു സാംസ്കാരിക രംഗത്ത് തന്റെ വ്യക്തിമുദ്ര പതിപ്പിച്ചത്.
1971 മുതല് കോഴിക്കോട്ടെ ‘അശ്വിനി ഫിലിം സൊസൈറ്റി’യുടെ ജനറല് സെക്രട്ടറിയാണ്. ഒരുപക്ഷേ ഒരു ഫിലിം സൊസൈറ്റിയുടെ ജനറല് സെക്രട്ടറിയായി പ്രവര്ത്തിച്ച മറ്റൊരാള് ഇന്ത്യയിലുണ്ടാവില്ല. കൂടാതെ സൈക്കോ മനശ്ശാസ്ത്ര മാസികയുടെ പത്രാധിപര് ആയിരുന്നു. മനസ്സ് ഒരു സമസ്യ, മനസ്സിന്റെ വഴികള് എന്നിവയാണ് പ്രസിദ്ധീകരിച്ച കൃതികള്. അനശ്വര സംവിധായകനായ ജോണ് എബ്രഹാമിന്റെ ജീവിതം ആസ്പദമാക്കി പ്രശസ്ത സിനിമ നിരൂപകന് പ്രേംചന്ദ് സംവിധാനം ചെയ്ത ജോണ് എന്ന ചിത്രത്തില് അഭിനയിച്ചിട്ടുണ്ട്.
